អាជ្ញាធរខេត្តព្រះសីហនុ ប្រកាសផ្ដល់រង្វាន់ចំពោះពលរដ្ឋរូបណា ផ្ដល់ព័ត៌មានជុំវិញសកម្មភាពក្រុមចោរលួចកាត់ខ្សែភ្លើងបំភ្លឺផ្លូវ

រដ្ឋបាលខេត្តព្រះសីហនុ បានប្រកាសផ្ដល់រង្វាន់លើកទឹកចិត្ត និងរក្សាការសម្ងាត់ចំពោះប្រជាពលរដ្ឋរូបណាសហការផ្ដល់ព័ត៌មានដល់អាជ្ញាធរ ជុំវិញសកម្មភាពក្រុមចោរលួចកាត់ខ្សែភ្លើងបំភ្លឺផ្លូវសាធារណៈ នៅក្នុងភូមិសាស្រ្ដខេត្តព្រះសីហនុ។

លោក គួច ចំរើន អភិបាលខេត្តព្រះសីហនុ កាលពីថ្ងៃទី ២៤ ខែតុលា បានបង្ហោះសារអំពីករណីក្រុមចោរលួចកាត់ខ្សែភ្លើង នៅតាមបណ្តោយវិថីសំខាន់ៗ ក្នុងខេត្តព្រះសីហនុ។ លោកអភិបាលខេត្ត បានសរសេរថា «លោកចោរ​ ពិតជាឃោរឃៅ​ តភ្ជាប់ភ្លើងបានម្សិលមិញ​យប់មិញ​ លោកចោរ​លួចកាត់អស់​ ១១៣​ម៉ែត្រ​ អត់ភ្លឺទៀត​។ គង់មានថ្ងៃលោកចោរដឹងខ្លួនទេ​»។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានឲ្យដឹងនៅថ្ងៃទី ២៥ ខែតុលានេះដែរថា ក្រុមចោរ ដែល លួចកាត់ខ្សែភ្លើងបំភ្លឺផ្លូវសាធារណៈ នៅតាមបណ្តោយវិថីសំខាន់ៗ នៅក្នុងភូមិសាស្ត្រខេត្តព្រះសីហនុ នាពេលកន្លងមក គឺជាចោរដែលមានអង្គការចាត់តាំង និងបានធ្វើសកម្មភាពជាប្រចាំដោយផ្លាស់ប្តូរទីតាំង ដើម្បីបង្វែងដានសមត្ថកិច្ច។

លោក ឃាង ភារម្យ បានបញ្ជាក់ថា សមត្ថកិច្ច បាននិងកំពុងតាមប្រមាញ់ក្រុមចោរបំផ្លិចបំផ្លាញទ្រព្យសម្បត្តិសាធារណៈទាំងនេះហើយ ដើម្បីយកមកផ្តន្ទាទោសតាមច្បាប់ឲ្យខានតែបាន។ ជាមួយគ្នានេះ រដ្ឋបាលខេត្ត នឹងផ្តល់រង្វាន់លើកទឹកចិត្ត ព្រមទាំងរក្សាការសំងាត់ជូនប្រជាពលរដ្ឋណា ដែលបានចូលរួមសហការផ្តល់ព័ត៌មាន ដល់អាជ្ញាធរមានសមត្ថកិច្ច ករណីប្រទះឃើញសកម្មភាពក្រុមចោរលួចកាត់ខ្សែភ្លើង ដើម្បីចាត់វិធានការបានទាន់ពេលវេលា៕