ឆេះ​ក្លិប​កម្សាន្ត​មួយកន្លែង ទើបបើកអាជីវកម្ម​បាន​​ជាង​មួយខែ

ក្លឹបកម្សាន្តរាត្រីមួយកន្លែងមាន យីហោ “LOL” ដែលទើបបើកស្វាគមន៍ភ្ញៀវត្រឹមតែរយះពេលខ្លី ស្ថិត​នៅភូមិ២០ឧសភា សង្កាត់ស្វាយប៉ោ ក្រុងបាត់ដំបង នៅវេលាម៉ោង ៥ល្ងាច នាថ្ងៃទី ០៤ខែវិច្ឆកានេះ ត្រូវ​បាន​​អគ្គិភ័យឆាបឆេះដោយមិនទាន់​ដឹងអំពីមូលហេតុនៅឡើយ។

ហេតុការណ៍​នេះ​ លោកអភិបាលខេត្តនិងលោកស្នងការាន​ចុះ​ទៅ​ដឹកនាំបញ្ជាកម្លាំង ខណៈមានប្រជាពលរដ្ឋរាប់រយនាក់បាននាំគ្នាប្រើប្រាស់គ្រប់មធ្យោបាយ ដើម្បី​ជួយសង្រ្គោះនិងពន្លត់អគ្គិភ័យដែលឆាបឆេះ។

បើតាមការលើកឡើងពីប្រជាពលរដ្ឋនៅជិតកន្លែងកើតហេតុបានឲ្យដឹងថា ក្លឹបរាត្រីដែលមានយីហោ “LOL” នេះទើបតែ​បើកដំណើរការស្វាគមន៍ភ្ញៀវ បានរយៈពេលប្រហែលជាងមួយខែប៉ុណ្ណោះ ក៏ត្រូវអគ្គិភ័យឆាបឆេះដោយមិនទាន់ដឹងមូល។ ពេលនេះនៅមិនទាន់មានសេចក្ដីរាយការណ៍អំពីការខូចខាតឬមានគ្រោះថ្នាក់មនុស្សណាម្នាក់នៅឡើយនោះទេ ខណះមូលហេតុនៃការឆេះក៏នៅមិនទាន់មានការសន្និដ្ឋាននៅឡើយដែរ៕

អត្ថបទ៖ សៅ សារិទ្ធ