សន្តិសុខសង្គម

បញ្ជូនបុរសម្នាក់ទៅសាលាដំបូង ពីបទយកកាំបិតចុងស្រួចប៉ងធ្វើឃាតស្ត្រីចំណាស់ សង្ស័យចេះអាបធ្មប់

បានផុស

៤ years មុន

នៅ

ថ្ងៃសុក្រ ១១ វិច្ឆិកា ២០២២

ដោយ

មន្ត្រីនគរបាល នៃស្នងការដ្ឋាននគរបាលខេត្តមណ្ឌលគិរី នៅថ្ងៃទី ១១ ខែវិច្ឆិកា ឆ្នាំ ២០២២ បានបញ្ជូនបុរសម្នាក់ទៅសាលាដំបូងខេត្ត ជាប់ចោទពីបទប៉ុនប៉ងមនុស្សឃាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសជាជនជាប់សង្ស័យ ចោទប្រកាន់ស្ត្រីចំណាស់ម្នាក់ថា ចេះអំពើអាបធ្មប់ ហើយបានប៉ងចាក់សម្លាប់ស្ត្រីរូបនោះ។

សមត្ថកិច្ចនគរបាលស្រុកកោះញែក ឲ្យដឹងថា សមត្ថកិច្ចបានចាប់ខ្លួនបុរសម្នាក់ កាលពីថ្ងៃទី ០៩ ខែវិច្ឆិកា ឆ្នាំ ២០២២ ពីបទយកកាំបិតចុងស្រួច ប៉ងចាក់សម្លាប់ស្ត្រីម្នាក់ដែលបុរសនោះសង្ស័យចេះអំពើអាបធ្មប់។ ហេតុការណ៍នេះបានកើតឡើងនៅក្នុងភូមិរវាក់ ឃុំរយ៉ ស្រុកកោះញែក ខេត្តមណ្ឌលគិរី។

ប្រភពខាងលើបន្តថា ជនសង្ស័យឈ្មោះ អ៊ូ សុខលាប អាយុ ៣៩ ឆ្នាំ ជនជាតិខ្មែរ មុខរបរកសិករ មានទីលំនៅភូមិ-ឃុំខាងលើ បានប្រើប្រាស់កូនកាំបិតចិតបន្លែ ហើយដើរឡើងទៅដល់លើផ្ទះរបស់ជនរងគ្រោះឈ្មោះ សឿ សាវេត ភេទស្រី អាយុ ៥៧ ឆ្នាំ មុខរបរកសិករ បម្រុងចាក់សម្លាប់ ដោយជនសង្ស័យ គិតថា ជនរងគ្រោះចេះអំពើអាបធ្មប់។ ជាមួយនោះ ត្រូវបានប្តីរបស់ជនរងគ្រោះទៅទាន់ ហើយជនសង្ស័យក៏រត់គេចខ្លួនបាត់ ១ យប់។

បន្ថែមពីនោះ លុះព្រឹកឡើង ជនរងគ្រោះបានមកប្តឹងសមត្ថកិច្ចដែលប្រចាំការនៅមូលដ្ឋាននោះ ក៏បានទៅឃាត់ខ្លួនជនសង្ស័យ យកមកសាកសួរនៅឯស្នាក់ការប៉ុស្តិ៍នគរបាល រយ៉។

បច្ចុប្បន្ន ជនសង្ស័យ ត្រូវបានកម្លាំងជំនាញ នៃអធិការដ្ឋាននគរបាលស្រុកកោះញែក សាកសួរ និងកសាងសំណុំរឿង ដើម្បីបញ្ជូនទៅកាន់តុលាការចាត់ការតាមនីតិវិធី កាលពីព្រឹកថ្ងៃទី ១១ ខែវិច្ឆិកា ឆ្នាំ ២០២២៕

អត្ថបទ ៖ វុទ្ធឦសាន