ជនជាតិចិន ដែលបាញ់២គ្រាប់ព្រោះខឹងសន្តិសុខមិនអោយជក់បារីក្នុងហាង អាចប្រឈមជាប់ពន្ធគារពី៦ខែ ទៅ២ឆ្នាំ

ជនជាតិចិនដែលដកកាំភ្លើងបាញ់ចំនួន០២ ព្រោះខឹងសន្តិសុខហាមមិនអោយជក់បារីក្នុងភោជនីយដ្ឋាន មួយកន្លែងអាចប្រឈមជាប់ទោស ចន្លោះពី០៦ខែ ដល់២ឆ្នាំ។ នេះបើតាមការបញ្ជាក់ពីលោក ឆាយ ហុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឆាយ ហុង បញ្ជាក់ថា បុរសជនជាតិចិនរូបនោះត្រូវបានតំណាងអយ្យការបើកការស៊ើបសួរពីបទកាន់កាប់ ប្រើប្រាស់ លក់ ទិញ នូវអាវុធគ្រឿងផ្ទុះ ដោយគ្មានការអនុញ្ញាត តាមមាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ ។

អ្នកនាំពាក្យ បានបន្តបញ្ជាក់ថា យោងតាមមាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ ជនណាដែលបំពាក់ដាក់តាមខ្លួន កាន់កាប់ ប្រើប្រាស់ លក់ ទិញអោយខ្ចី ផ្ទេរ ចែកចាយ ជួល កែច្នៃតម្លើង ជួសជុល នូវអាវុធ គ្រឿងផ្ទុះ និងគ្រាប់រំសេវគ្រប់ប្រភេទដោយគ្មានការអនុញ្ញាត ត្រូវផ្តន្ទាទោសដាក់ពន្ធនាគារពី ៦ខែ ដល់ ២ឆ្នាំ និងត្រូវពិន័យជាប្រាក់ពី ៥០ ម៉ឺនដល់២ លានរៀល ដោយពុំទាន់គិតពីបទល្មើសព្រហ្មទណ្ឌផ្សេងទៀត ។

គួរបញ្ជាក់ផងដែរថា កាលពីវេលាម៉ោង២និង៥០នាទី រំលងអាធ្រាតឈានចូលថ្ងៃទី១១ ខែឧសភា ឆ្នាំ២ ០២៥ នៅចំណុចហាងចិនមួយកន្លែងយីហោ (ផ្ទះបាយ ជៀ ស៊ាំង) ស្ថិតនៅផ្លូវ២៣២ កែង១១១ សង្កាត់បឹងព្រលិត ខណ្ឌ៧មករា រាជធានីភ្នំពេញ មានជនជាតិចិនបានដកកាំភ្លើង បាញ់លើមេឃ០២គ្រាប់ គម្រាមសន្តិសុខ ព្រោះសន្តិសុខ ហាមឃាត់មិនអោយជក់បារី កំឡុងពេលផឹកស្រា ក្នុងភោជនីយដ្ឋាន ៕

អត្ថបទ៖ រដ្ឋា