លើករងដាំដំឡូងនៅខាងក្រោយផ្ទះ ប្រទះឃើញគ្រាប់មិនទាន់ផ្ទុះប្រភេទ B60 ១១គ្រាប់

គ្រាប់បែកប្រភេទគ្រាប់ B60 និងគ្រាប់ឡង់ សរុបចំនួន១១គ្រាប់ ត្រូវបានប្រជាពលរដ្ឋប្រទះឃើញកប់ក្នុងដីនៅកណ្ដាលចម្ការ ខណៈដែលពួកគាត់កាយដីពូនរងដាំដំណាំ។

ការភ្ញាក់ផ្អើលនេះគឺបានកើតឡើងវេលាម៉ោង៨និង៣០នាទីព្រឹក ថ្ងៃទី២៥ ខែមិថុនា ឆ្នាំ២០២៥ នៅចំណុចកណ្ដាលចម្ការដាំដំឡូងខាងក្រោយផ្ទះប្រជាពលរដ្ឋ ភូមិកណ្ដាល ឃុំកំពង់ល្ពៅ ស្រុកសំឡូត ខេត្តបាត់ដំបង។

បើតាមការរៀបរាប់ពីប្រជាពលរដ្ឋឈ្មោះ ភួង ហ៊ួត ភេទប្រុស អាយុ៥៨ឆ្នាំជាប្រជាការពារ រស់នៅក្នុងភូមិឃុំខាងលើ បានបញ្ជាក់ថា នៅមុនពេលកើតហេតុគាត់បានពូនរងដើម្បីដាំដំឡូងនៅខាងក្រោយផ្ទះក៏បានប្រទះឃើញគ្រាប់មិនទាន់ផ្ទុះចំនួន១១គ្រាប់ ប្រភេទគ្រាប់ B60 ចំនួន១០គ្រាប់ និងប្រភេទគ្រាប់ឡង់ចំនួន១គ្រាប់។ ភ្លាមៗនោះលោកបានផ្ដល់ដំណឹងទៅសមត្ថកិច្ច ហើយក៏បានរាយការណ៍ជូនមន្ត្រីសុីម៉ាក់ ដើម្បីអនុវត្តតាមវិធីសាស្រ្តរបស់អង្គភាពជំនាញ៕

អត្ថបទ៖ សោ និយមរ័ត្ន