វឿន វាសនា វ៉ាដាច់ អ្នកលេខ ២ ជាង ១០០ ពិន្ទុ ឈរជាកីឡាកររកពិន្ទុច្រើនជា​ងគេនៅ​តៃវ៉ាន់

កីឡាករ វឿន វាសនា កំពុងឈរជាកីឡាកររកបានពិន្ទុច្រើនជាងគេក្នុងលីគបាល់ទះកំពូល តៃវ៉ាន់ (TPVL) រដូវកាល ២០២៥-២០២៦ ដោយវ៉ាអ្នកឈរលេខ ២ រហូតដល់ជាង ១០០ ពិន្ទុ បន្ទាប់ពីការប្រកួត ២ ប្រកួតចុងក្រោយនៃសប្តាហ៍ទី ១៩ ស្មាត់ជម្រើសជាតិ កម្ពុជា រកបានពិន្ទុច្រើនជាងគេប្រចាំក្រុមទាំង ២ ប្រកួត។

រម្លឹកនៅក្នុងការប្រកួតសប្តាហ៍ទី ១៩ កន្លងទៅ ក្រុមបាល់ទះ Win Streak បានទទួលជ័យជម្នះទាំង ២ ប្រកួតជាប់គ្នា ដោយការប្រកួតទល់នឹងក្រុម Taoyuan Cloud Leopard កាលពីថ្ងៃ សៅរិ៍ ទី ៧ ខែ កុម្ភៈ បានយកឈ្នះក្នុងលទ្ធផល ៣ សិតទល់ ០។ ចំណែកការប្រកួតទល់នឹងក្រុម Taipei East Power នៅថ្ងៃ អាទិត្យ ទី ០៨ ខែ កុម្ភៈ បានយកឈ្នះក្នុងលទ្ធផល ៣ សិតទល់ ០។ ជ័យជម្នះ​ចុង​ក្រោយ​នេះ​ក៏​បាន​ផ្តល់​ឲ្យ វឿន វាសនា បាន​ក្លាយ​ជា​កីឡាករ​ល្អ​ប្រចាំ​ការ​ប្រកួត​ថែម​ទៀត​ផង។

វឿន វាសនា បានដើរតួយ៉ាងសំខាន់នៅក្នុងការប្រកួតទាំង ២ ប្រកួតនោះ ដោយរូបគេរកបានពិន្ទុច្រើនជាងគេប្រចាំក្រុមទាំង ២ ប្រកួត។ ការប្រកួតទល់នឹងក្រុម Taoyuan Cloud Leopard ស្មាត់ កម្ពុជា កម្ពស់ ១.៩៦ ម៉ែត្ររកបានពិន្ទុចំនួន ១៤ ពិន្ទុ។ ចំណែកការប្រកួតទល់នឹងក្រុម Taipei East Power វាសនា រកបានពិន្ទុចំនួន ១៩ ពិន្ទុ និងត្រូវបានជ្រើសរើសជាកីឡាករល្អបំផុតប្រចាំការប្រកួតផងដែរ។

បច្ចុប្បន្ន វឿន វាសនា កំពុងជាប់ជាកីឡាកររកបានពិន្ទុច្រើនជាងគេប្រចាំលីគបាល់ទះកំពូល តៃវ៉ាន់ ដោយរកបានពិន្ទុសរុបរហូតដល់ទៅ ៧២៥ ពិន្ទុឯណោះ។ ចំណែកស្មាត់របស់ក្រុម TSG SkyHawks កីឡាករ Stijn van Schie ឈរនៅលេខ ២ ដោយរកបាន ៦១២ ពិន្ទុ។ ដូច្នេះ វាសនា ពេលនេះកំពុងមានពិន្ទុដាច់អ្នកលេខ ២ ឆ្ងាយខ្លាំងមែនទែន រហូតដល់ទៅ ១១៣ ពិន្ទុឯណោះ។

វឿន វាសនា រដូវកាលនេះ មិនត្រឹមតែមានស្ថិតិល្អលក្ខណៈឯកត្តជននោះទេ សូម្បីក្រុម Win Streak ក៏កំពុងល្អខ្លាំងផងដែរ ដោយឆ្លងកាត់ ៣៦ ប្រកួត ឈ្នះ ៣២ ប្រកួត និងចាញ់ ៤ កំពុងឈរនៅកំពូលតារាងនៃលីគបាល់ទះកំពូល តៃវ៉ាន់៕

អត្ថបទ៖ សេម កុសល