កីឡា

លោក Pep Muñoz គិតថា ភ្នំពេញក្រោន នឹងធ្វើអ្វីគ្រប់យ៉ាងដើម្បីពានអន្តរជាតិ

បានផុស

៥ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

អតីតគ្រូបង្វឹកព្រះខ័នរាជស្វាយរៀង Pep Muñoz ចាត់ទុកការពង្រឹងក្រុមរបស់ ភ្នំពេញក្រោន ជាការផ្តោតសំខាន់លើពានរង្វាន់អន្តរជាតិ បន្ទាប់ពីពួកគេធ្វើមិនសូវបានល្អមួយរយៈពេលចុងក្រោយក្នុងលីគបាល់ទាត់កំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំពេញក្រោន បានបង្កើតការភ្ញាក់ផ្អើលតាមរយៈការប្រកាសនាំចូលកីឡាករបរទេសថ្មី ៣ នាក់ទៀតសម្រាប់ពានរង្វាន់ទ្វីបអាស៊ី AFC Challenge League ត្រៀមវគ្គ ៨ ក្រុមចុងក្រោយ។ កីឡាករថ្មីទាំង ៣ នាក់នោះមានដូចជាខ្សែបម្រើសញ្ជាតិអ៊ុយក្រែន Valeriy Gryshyn, ខ្សែការពារសញ្ជាតិអ៊ីតាលី Pape Serigne និងខ្សែបម្រើសញ្ជាតិ កាណាដា Diego Gutiérrez។ រហូតដល់ពេលនេះ ភ្នំពេញក្រោន មានកីឡាករបរទេសចំនួន ១១នាក់ហើយ។

ក្រឡេកមើលលទ្ធផលក្នុងលីគបាល់ទាត់កំពូលកម្ពុជាវិញ ភ្នំពេញក្រោន មាន ៤៣ ពិន្ទុ តាមពីក្រោយ ៥ ពិន្ទុ ទៅនឹងក្រុមកំពូលតារាង ព្រះខ័នរាជស្វាយរៀង ដែលមាន ៤៨ ពិន្ទុ។ គម្លាតពិន្ទុនេះ កាន់តែធ្វើឲ្យ ភ្នំពេញក្រោន ពិបាកក្នុងការប្រជែងជើងឯកលីគកំពូលកម្ពុជា។ ប្រការនេះអាចនឹងធ្វើឲ្យ ភ្នំពេញក្រោន ដាក់គោលដៅធំក្នុងពានរង្វាន់អន្តរជាតិដែលត្រូវប្រជែងជាមួយ ព្រះខ័នរាជស្វាយរៀង ទៀត។

លោក Pep Muñoz បានលើកឡើងថា ៖«ភ្នំពេញក្រោន កំពុងធ្វើមិនសូវបានល្អនៅលីគក្នុងរយៈពេលថ្មីៗនេះ ដូច្នេះខ្ញុំគិតថា ពួកគេនឹងធ្វើអ្វីៗគ្រប់យ៉ាងដើម្បីពានអន្តរជាតិ Challenge League។ វានឹងក្លាយជាការប្រកួតដ៏គួរឲ្យចង់មើលរវាង ភ្នំពេញក្រោន និង ព្រះខ័នរាជស្វាយរៀង»។

ភ្នំពេញក្រោន និង ព្រះខ័នរាជស្វាយរៀង ដែលគូប្រជែងក្នុងស្រុកសម្រាប់ពានរង្វាន់អន្តរជាតិ នឹងប្រកួតគ្នាវគ្គ ៨ ក្រុមចុងក្រោយ ដោយជើងទី១ ថ្ងៃទី៥ ខែមីនា នៅពហុកីឡដ្ឋានជាតិអូឡាំពិក និងជើងទី២ ថ្ងៃទី១២ ខែមីនា ឆ្នាំ ២០២៦ នៅពហុកីឡដ្ឋានជាតិមរតកតេជោ។ ដូច្នេះកម្ពុជា នឹងមាន ១ ក្រុមឡើងទៅកាន់វគ្គពាក់កណ្តាលផ្តាច់ព្រ័ត្រដោយស្វ័យប្រវត្តិ។