កីឡា

ទឹកចិត្តស្នេហាជាតិ! ពលរដ្ឋកម្ពុជានៅវៀតណាម ប្រមូលគ្នាទៅគាំទ្រ ព្រះខ័នរាជស្វាយរៀង លើសពីធម្មតា

បានផុស

២ ខែ មុន

នៅ

ថ្ងៃពុធ ២២ មេសា ២០២៦

ដោយ

ក្រុមបាល់ទាត់ ព្រះខ័នរាជស្វាយរៀង នឹងប្រកួតជាមួយ ក្រុម Bangkok United វេលាម៉ោង ៦:៣០ នាទីល្ងាចនេះនៅកីឡដ្ឋាន Hang Day ក្នុងប្រទេសវៀតណាម សម្រាប់ការប្រកួតវគ្គសន្សំពិន្ទុចុងក្រោយពានរង្វាន់ក្លិបកំពូលអាស៊ាន ASEAN Club Championship។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនេះទំនងជាអ្នកគាំទ្រកម្ពុជាយ៉ាងច្រើនកុះករលើកទឹកចិត្តក្រុមព្រះខ័នរាជស្វាយរៀង។ លោកស្រី សំ ថាវី ប្រធានអ្នកគាំទ្រផ្លូវការរបស់ក្លិបព្រះខ័នរាជស្វាយរៀង បានប្រាប់សារព័ត៌មាន«កម្ពុជាថ្មី»ថា គិតត្រឹមយប់ថ្ងៃទី២១ ខែមេសា ឆ្នាំ ២០២៦ ប្រជាពលរដ្ឋកម្ពុជាដែលស្ថិតនៅប្រទេសវៀតណាមប្រហែលជា ៦០០នាក់ គ្រោងនឹងទៅទស្សនា និងលើកទឹកចិត្តផ្ទាល់ដល់ក្រុមព្រះខ័នរាជស្វាយរៀង។

ប្រធានអ្នកគាំទ្រផ្លូវការបានសង្កត់ធ្ងន់ថា នេះជាសន្ទុះចិត្តស្នេហាជាតិ និងគាំទ្រក្រុមរបស់កម្ពុជាលើសពីធម្មតា។ នៅពេល ព្រះខ័នរាជស្វាយរៀង ប្រកួតជាមួយក្រុមរបស់ វៀតណាម Nam Dinh កាលពីថ្ងៃទី២៥ ខែកញ្ញា ឆ្នាំ ២០២៥ ប្រជាពលរដ្ឋកម្ពុជានៅវៀតណាមបានទៅទស្សនាផ្ទាល់ប្រមាណ ៣០០ នាក់ ប៉ុន្តែលើកនេះមានចំនួនកើនឡើងទ្វេរដង។ លោកស្រីពិតជារំភើបរីករាយដែលឃើញសន្ទុះចិត្តអ្នកគាំទ្រយ៉ាងខ្លាំងបែបនេះ។

បើតាមការឲ្យដឹងពីលោកស្រី សំ ថាវី គឺថា ភាគច្រើនអ្នកគាំទ្រជាពលរដ្ឋខ្មែរជាសិស្សនិស្សិតកំពុងសិក្សានៅប្រទេសវៀតណាម។ ពួកគាត់គ្រោងនឹងចំណាយពេលវេលា និងថវិកាផ្ទាល់ខ្លួនដើម្បីធ្វើដំណើរឆ្ងាយពីតំបន់របស់ខ្លួនទៅកាន់កីឡដ្ឋាន Hang Day។ តាមស្ថិតិជាក់ស្តែងគឺ ១៥០នាក់ ត្រូវធ្វើដំណើរពីសាលារៀនចម្ងាយ ៥គីឡូម៉ែត្រ, ១១០នាក់ត្រូវធ្វើដំណើរពីសាលារៀនចម្ងាយ ៤០គីឡូម៉ែត្រ, ៦៥នាក់ត្រូវធ្វើដំណើរពីសាលាយោធាពេទ្យចម្ងាយ ១០គីឡូម៉ែត្រ, ១៥នាក់ត្រូវធ្វើដំណើរពីសាលាបង្ការអគ្គីភ័យចម្ងាយ ៦គីឡូម៉ែត្រ, ៥៥នាក់ត្រូវធ្វើដំណើរពីសាលាបច្ចេកទេសយោធាចម្ងាយ ៧ គីឡូម៉ែត្រ, ៩១នាក់ត្រូវធ្វើដំណើរចម្ងាយ ១០០ គីឡូម៉ែត្រ និងមកពីសាលាទ័ពអាកាសជិត ១០០ នាក់ ព្រមទាំងមកពីតំបន់មួយចំនួនទៀតដែលសរុបមិនក្រោម ៦០០នាក់ឡើយ។

បើទោះបីជាការប្រកួតបង្ក្រប់កិច្ចមែន ប៉ុន្តែជាការប្រកួតដែលក្រុមទាំងពីរស្វែងរកកំណត់ត្រាល្អរៀងៗខ្លួន។ ព្រះខ័នរាជស្វាយរៀង ត្រូវការរក្សាចំណាត់ថ្នាក់លេខ ៣ ក្នុងពូលឲ្យបាន និងដើម្បីអ្នកគាំទ្រ។ ព្រះខ័នរាជស្វាយរៀង ត្រូវការត្រឹមស្មើក៏នៅតែរក្សាចចំណាត់ថ្នាក់លេខ ៣ ប៉ុន្តែបើចាញ់ គឺនឹងមាន ៧ ពិន្ទុស្មើគ្នា ហើយត្រូវគិតលើគ្រាប់បាល់។

ចំណែក Bangkok United ច្បាស់ជាមិនចង់នៅក្រោមក្លិបរបស់កម្ពុជាឡើយ ហើយក៏ប្រាកដជាមិនចង់មានកំណត់ត្រាអាក្រក់ជាមួយក្លិបកម្ពុជាដែរ ដោយសារពួកគេតែងតែគិតថា ក្រុមបាល់ទាត់កម្ពុជាមានកម្រិតសមត្ថភាពទាបជាងខ្លួន។

ការប្រកួតរវាង ព្រះខ័នរាជស្វាយរៀង និង Bangkok United នឹងផ្សាយបន្តផ្ទាល់ទៅកាន់ប្រទេសអាស៊ានទាំង ១១ និងប្រទេសផ្សេងទៀត។ ដោយឡែកសម្រាប់កម្ពុជា ផ្សាយបន្តផ្ទាល់តាមកញ្ចក់ទូរស្សន៍ Bayon TV និងផេក BTV Sport៕

អត្ថបទ៖ វិរបុត្រ

ព័ត៌មានអន្ដរជាតិ២៣ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា