ដឹងអត់ Ronaldo ឲ្យលុយមិត្តស្រីចាយ មួយខែប៉ុន្មាន?

ជាមួយនឹងចំណូលកប់ក្ដោង​ ពីការលេងកីឡា និងការផ្សាយជាពាណិជ្ជកម្មនានា CR7 បានផ្តល់ឱ្យមិត្តស្រីជាទីស្រឡាញ់នូវទឹកប្រាក់ជាង ១ម៉ឺនអឺរ៉ូ ដើម្បីឱ្យនាងចំណាយមើលថែកូនៗជារៀងរាល់ខែ។

ថ្វីត្បិតមិនទាន់រៀបការជាផ្លូវការ ប៉ុន្តែ Ronaldo និងមិត្តស្រីរស់នៅប្រៀបបាននឹងប្តីប្រពន្ធ ហើយ Georgina គឺជាមេផ្ទះដែលមើលការខុសត្រូវទាំងអស់នៅក្នុងគ្រួសារ។ ដោយមានកូន ៥នាក់នៅក្នុងបន្ទុក ​នាងត្រូវរ៉ាប់រងសឹងគ្រប់យ៉ាងមិនថាជូនកូនទៅសាលា ជូនទៅកន្លែងហាត់កីឡា ព្រមទាំងចម្អិនអាហារសម្រាប់ពួកគេទៀតផង។

ដូចគ្រួសារដទៃទៀតដែរ Ronaldo គឺជាអ្នករកប្រាក់ចំណូលដ៏សំខាន់ជាងគេរបស់គ្រួសារ និងចេញថ្លៃចំណាយដ៏សន្ធឹកសន្ធាប់ប្រចាំខែ។ កីឡាកររបស់ Manchester United រូបនេះ បច្ចុប្បន្នគឺជាតារាដែលរកចំណូលបានច្រើនជាងគេលំដាប់ទី២ ក្នុងពិភពលោក ដូច្នេះហើយវាមិនគួរឱ្យភ្ញាក់ផ្អើលទេដែលគ្រួសាររបស់លោករស់នៅយ៉ាងបរិបូរណ៍ និងប្រណីតខ្លាំង។

យោងតាមសារព័ត៌មានលោកខាងលិច Ronaldo តែងតែផ្តល់ឱ្យ Georgina នូវចំនួនទឹកប្រាក់ដ៏ធំប្រចាំខែ រហូតដល់ ១ម៉ឺនអឺរ៉ូ (ជាង ១០៧,០០០ ដុល្លារអាមេរិក) ដើម្បីផ្គត់ផ្គង់ការចំណាយក្នុងផ្ទះ ​និងថែរក្សាគ្រួសារធំមួយនេះ។

ប្រភពជាច្រើនបានឱ្យដឹងថា ទោះ​បី​ Georgina ជា​ម្ដាយ​ចុង​ក៏​ដោយ ក៏នាង​ស្រឡាញ់កូនស្មើៗគ្នា និងមើលថែពួកគេបានយ៉ាងល្អ។ ​ជាក់ស្ដែងកូនប្រុសទី១ Cristiano Ronaldo Jr បានអបអរជ័យជម្នះរបស់ខ្លួនដោយសរសេរអក្សរ G នៅលើគ្រាប់បាល់ ដែលជាអក្សរទីមួយនៃឈ្មោះរបស់ Georgina ទៀតផង។

ក្រៅ​ពី​ការងារ​ផ្ទះ និង​មើល​ថែ​កូន Georgina ក៏​មានអាជីពផ្ទាល់ខ្លួន​ ដោយនាងអាចរកប្រាក់​បាន​រាប់​សិប​លាន​ដុល្លារឯណោះ។ យោងតាមការគណនាដោយសារព័ត៌មាននានា ទ្រព្យសម្បត្តិផ្ទាល់ខ្លួនរបស់តារាម៉ូឌែលរូបនេះ មានដល់ទៅ ១០លានដុល្លារអាមេរិក ហើយដោយសារមានអ្នកតាមដានជាង ៣៨លាននាក់ នៅលើបណ្តាញសង្គម IG រូបថតនីមួយៗដែលនាងបង្ហោះ ​​អាចប្រមូលចំណូលមកវិញបានយ៉ាងច្រើនផងដែរ៕

ប្រែសម្រួល៖ សន្យា

ចុចអាន៖ មិត្តស្រី Ronaldo ធ្វើរឿងមួយពេលចូលរួមកម្មវិធី Cannes ថ្ងៃមុន មហាជនចំហមាត់ធ្លុង

ចុចអាន៖ ពេលស្គាល់ប្រវត្តិច្បាស់ ទើបដឹងថា កូនស្រី Jonny Depp ជាមនុស្សមិនធម្មតា