កីឡា

ពានរង្វាន់សម្តេចតេជោ ហ៊ុន សែន សប្ដាហ៍នេះផ្លាស់ប្ដូរកាលបរិច្ឆេទការប្រកួតមួយគូ ដោយសារកង្វះកីឡាករ

បានផុស

២ years មុន

នៅ

ថ្ងៃចន្ទ ៤ កក្កដា ២០២២

ដោយ

ការប្រកួតដណ្ដើមពានរង្វាន់សម្តេចតេជោ ហ៊ុន សែន លើកទី១៦ ឆ្នាំ២០២២ វគ្គជម្រុះថ្នាក់ជាតិ ជើងទី២ សប្ដាហ៍នេះ នឹងមានការផ្លាស់ប្ដូរកាលបរិច្ឆេទការប្រកួតមួយគូ ដោយសារកង្វះកីឡាករទៅបំពេញបេសកកម្មប្រកួតក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលិខិត ក្លិបបាល់ទាត់អាស៊ីអឺរ៉ុបយូណាយធីត បានស្នើសុំផ្លាស់ប្ដូរកាលបរិច្ឆេទប្រកួតជើងទី២ ទល់នឹងក្លិបបាល់ទាត់ភ្នំពេញហ្គាឡាក់ស៊ី ដែលដើមឡើយគ្រោងប្រកួតនៅថ្ងៃទី០៧ ខែកក្កដា នេះ ត្រូវលើកទៅប្រកួតនៅថ្ងៃទី២០ ខែកក្កដា ឆ្នាំ២០២២ វិញ ដោយសារកីឡាករមួយចំនួនរបស់ក្លិបមានមូលដ្ឋាននៅអរិយក្សត្រមួយនេះ ជាប់ឈ្មោះ និងចេញទៅប្រកួតពានយុវជនអាយុក្រោម ១៩ឆ្នាំអាស៊ាន (AFF U-19 Championship) នៅប្រទេសឥណ្ឌូនេស៊ី តំណាងឲ្យក្រុមជម្រើសជាតិកម្ពុជា អាយុក្រោម ១៩ឆ្នាំ ចាប់ពីថ្ងៃទី០២ ដល់ថ្ងៃទី១៥ ខែកក្កដា ឆ្នាំ២០២២។

បញ្ជាក់ថា ក្លិបបាល់ទាត់អាស៊ីអឺរ៉ុបយូណាយធីត មានកីឡាករ ៣នាក់ជាប់ U-19 កម្ពុជា រួមមាន កីឡាករ វ៉ាន់ វីត, ឆាន់ ប៊ុនមី និង ហាវ សុខនេត្រ។

រំឮកទៅដល់ការប្រកួតជើងទី១ របស់ក្រុមទាំង២ កាលពីថ្ងៃទី២២ ខែមិថុនា ឆ្នាំ២០២២ ម្ចាស់ផ្ទះ ភ្នំពេញហ្គាឡាក់ស៊ី បានយកឈ្នះ អាស៊ីអឺរ៉ុបយូណាយធីត ២ទល់១។ ជើងទី២ ដែលលើកទៅប្រកួតនៅថ្ងៃទី២០ ខែកក្កដា ឆ្នាំ២០២២ នឹងធ្វើនៅកីឡដ្ឋានអេអ៊ីយូស្បតផាក៕

អត្ថបទ ៖ មន្នីរ័ត្ន