កីឡា

លោក Conor Nestor និយាយពីកីឡាករយុវជន ៣រូបដែលចេញពីថ្នាលរបស់ព្រះខ័នរាជស្វាយរៀង ផ្ទាល់

បានផុស

៤ years មុន

នៅ

ថ្ងៃព្រហស្បតិ៍ ១៨ សីហា ២០២២

ដោយ

ចុងសប្ដាហ៍កន្លងទៅ ក្លិបបាល់ទាត់ព្រះខ័នរាជស្វាយរៀង បានយកឈ្នះ ក្លិបគីរីវង់សុខសែនជ័យ ដោយលទ្ធផល ១០-០ ក្នុងជំនួបសប្ដាហ៍ទី១៥ នៃពានរង្វាន់ខេមបូឌានព្រីមៀរលីគ នៅកីឡដ្ឋានខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រាប់បាល់ទាំង ១០គ្រាប់របស់ព្រះខ័នរាជស្វាយរៀង រកបានដោយកីឡាករ ៥នាក់ផ្សេងគ្នារួមមាន មិន រតនៈ ៤គ្រាប់, Marcus Haber ២គ្រាប់, គឹម សុខយុទ្ធ ២គ្រាប់ និង នី សុខរី ជាមួយ សុខ សំណាង ម្នាក់១គ្រាប់។ អ្វីដែលពិសេសនោះកីឡាករដែលជាយុវជនថ្នាលរបស់ក្លិបទើបឡើងមកឈុតធំថ្មីៗនេះ បានរកគ្រាប់បាល់ក៏ដូចជាបញ្ជូនបាល់ឱ្យគ្នាទៅវិញទៅមក រួមមាន មិន រតនៈ, គឹម សុខយុទ្ធ និង នី សុខរី ខណៈលោក Conor Nestor ដែលជាគ្រូបង្វឹកក៏បានសរសើរពីពួកគេផងដែរ ពិសេសសរសើរលើការខិតខំប្រឹងប្រែងរបស់គេ។

លោក Conor Nestor បាននិយាយដូច្នេះថា «ពិតណាស់ ព្រោះថាពួកគេសុទ្ធតែមកពីឈុតយុវជនរបស់យើង ពួកគេសុទ្ធតែក្មេង ហើយនឹងពួកគេមានការខិតខំប្រឹងប្រែង។ ដូច្នេះហើយនៅក្លិបនេះ បើអ្នកប្រឹងប្រែងខ្លាំង អ្នកនឹងទទួលបានឱកាសវាពិតជាល្អខ្លាំងមែនទែន ដែលពួកគេបានបញ្ចេញសមត្ថភាពរបស់ខ្លួននៅលើទីលាន។»

គួរបញ្ជាក់ថា មិន រតនៈ, គឹម សុខយុទ្ធ និង នី សុខរី សុទ្ធសឹងជាយុវជនថ្នាលអាយុក្រោម១៩ឆ្នាំ របស់ក្លិបព្រះខ័នរាជស្វាយរៀង ហើយត្រូវបានដំឡើងមកឈុតធំក្នុងអំឡុងឆ្នាំ២០១៩ សម្រាប់ មិន រតនៈ ខណៈគឹម សុខយុទ្ធ និង នី សុខរី នៅឆ្នាំ២០២០។

រដូវកាលនេះ ពួកគេទាំង៣នាក់បានរួមចំណែកច្រើនដល់ក្លិប ជាក់ស្ដែង មិន រតនៈ រកគ្រាប់បាល់បាន ៦គ្រាប់ហើយ និងបញ្ជូនបាល់ (assists) បាន ៥ដង ខណៈ គឹម សុខយុទ្ធ កគ្រាប់បាល់បាន ៣គ្រាប់ និងបញ្ជូនបាល់ (assists) បាន ៣ដង ស្របពេលដែល នី សុខរី កគ្រាប់បាល់បាន ១គ្រាប់ផងដែរ៕

អត្ថបទ ៖ មន្នីរ័ត្ន