កីឡា

ម៉ឺន មេឃា និង អេ អាំម៉ារីន កំពុងមានទីផ្សារធំនៅថៃ ប្រាក់រត់រក

បានផុស

៤ years មុន

នៅ

ថ្ងៃពុធ ២៨ កញ្ញា ២០២២

ដោយ

អ្នកប្រដាល់បងប្អូនបង្កើត ម៉ឺន មេឃា និង អេ អាំម៉ារីនភូថង ដែលជាកូនប្រុសរបស់លោក អេ ភូថង កំពុងទទួលបានការចាប់អារម្មណ៍យ៉ាងខ្លាំងពីសង្វៀនប្រដាល់ធំៗនៅប្រទេសថៃ បន្ទាប់ពីពួកគេបង្កព្យុះភ្លៀងនៅទីនោះមួយរយៈពេលចុងក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អេ អាំម៉ារីន បានប្រកួតឈ្នះពីរលើកជាប់គ្នាលើកីឡាករថៃនៅក្នុងទឹកដីរបស់ប្រទេសថៃ ហើយកាលពីយប់មិញនេះបងប្រុសបង្កើតរបស់គេគឺ ម៉ឺន មេឃា បានផ្តួលកីឡាករថៃឲ្យសន្លប់ក្នុងទឹកទី៣។

តាមការឲ្យដឹង អាំម៉ារីន និង ម៉ឺន មេឃា ទទួលបានប្រាក់តម្លៃខ្លួនចន្លោះពី១៥០០ដុល្លារទៅ២០០០ដុល្លារអាមេរិកក្នុងមួយប្រកួត។ ពួកគេនឹងទទួលបានប្រាក់តម្លៃខ្លួនកាន់តែខ្ពស់នាពេលខាងមុខនៅពេលប្រកួតកាន់តែល្បី និងឈានដល់ទៅរកការប្រកួតជើងឯក ឬខ្សែក្រវាត់ ដូច្នេះអាចនិយាយបានថា នៅពេលមានសមត្ថភាពខ្ពស់ ប្រាក់រត់រក។ មិនចាំបាច់ខ្វល់ពីរឿងប្រាក់តម្លៃខ្លួននោះទេគឺខិតខំហ្វឹកហាត់ឲ្យតែខ្លាំង មិនខ្វះសង្វៀនប្រកួតនោះទេទាំងនៅប្រទេសថៃ និងប្រទេសផ្សេងៗទៀត។

ពេលនេះ សង្វៀនប្រដាល់ធំៗរបស់ថៃកំពុងរកកីឡាករដើម្បីឲ្យប្រកួតជាមួយ ម៉ឺន មេឃា និង អេ អាំម៉ារីន បន្តទៀត ហើយថៃមិនខ្វះទេកីឡាករប្រដាល់ដែលល្អ និងមានសមត្ថភាពកម្រិតខ្ពស់។ ដូច្នេះកូនប្រុសរបស់លោក អេ ភូថង ខិតខំតែហ្វឹកហាត់ដើម្បីប្រកួត។

មិនត្រឹមតែប៉ុណ្ណោះ អ្នកសារព័ត៌មានជាច្រើនបានសម្ភាសលោក អេ ភូថង និងកូនប្រុសពីសមត្ថភាព ប្រវត្តិ និងសមិទ្ធផលជាដើម។ ពួកគេបាននិយាយថា ប្រហែលជាពីរប្រកួតទៀត អេ អាំម៉ារីន អាចនឹងប្រកួតដណ្តើមខ្សែក្រវាត់។ នៅពេលពួកគេឈានដល់ការប្រកួតដណ្តើមខ្សែក្រវាត់មានន័យថា ប៉ះសុទ្ធតែដៃគូខ្លាំងៗកម្រិតមួយថៃពិភពលោក។

ទាំងនេះហើយជាអ្វីដែលអ្នកគាំទ្រគុនខ្មែរចង់ឃើញកីឡាករកម្ពុជាសាងស្នាដៃលើឆាកអន្តរជាតិ។ ការប្រកួតលើឆាកអន្តរជាតិបែបនេះមានគុណសម្បត្តិច្រើនណាស់ដូចជាបង្កើតស្នាដៃផ្ទាល់ខ្លួន ផ្សព្វផ្សាយប្រដាល់គុន បង្កើនកេរ្តិ៍ឈ្មោះ និងទទួលបានប្រាក់ចំណូលខ្ពស់សម្រាប់ចិញ្ចឹមជីវភាពគ្រួសារ។

កន្លងមក អ្នកគាំទ្រគុនខ្មែរតែងតែឃើញកីឡាករថៃ និងកីឡាករមកពីប្រទេសផ្សេងៗមកប្រកួតនៅកម្ពុជា ហើយប្រមូលប្រាក់យកទៅស្រុករបស់ពួកគេ ប៉ុន្តែកីឡាករប្រដាល់កម្ពុជាតិចណាស់ចេញទៅប្រកួតរកប្រាក់នៅក្រៅប្រទេស។ ការចេញទៅប្រកួតនៅក្រៅប្រទេសមិនទទួលបានលទ្ធផលល្អថែមទៀត ដូច្នេះទីផ្សារប្រកួតនៅក្រៅប្រទេសកាន់តែចង្អៀតដោយសារសមត្ថភាពនៅមានកម្រិត។

យ៉ាងណា អេ អាំម៉ារីន និង ម៉ឺន មេឃា កំពុងទទួលបានលទ្ធផលល្អ ហើយពួកគេកំពុងពង្រីកទីផ្សារកាន់តែធំទូលាយនៅប្រទេសថៃ។ ជាមួយគ្នានេះ ក៏មានកីឡាករកម្ពុជាមួយចំនួនទៀតកំពុងចេញទៅប្រកួតនៅថៃដែរ ដូច្នេះជាកាលៈទេសៈល្អ និងជាអ្វីដែលអ្នកគាំទ្រគុនខ្មែរចង់ឃើញបំផុត៕

អត្ថបទ៖ វីរបុត្រ