កីឡា

ណាហ្គាវើលដ៍ ពេញជើងប៉ះព្រះខ័នរាជស្វាយរៀងល្ងាចនេះ

បានផុស

៤ years មុន

នៅ

ថ្ងៃសៅរ៍ ៨ តុលា ២០២២

ដោយ

ក្រុមណាហ្គាវើលដ៍ ត្រូវធ្វើដំណើរទៅជួបម្ចាស់ផ្ទះ ព្រះខ័នរាជស្វាយរៀង វេលាម៉ោង៦:៣០នាទីល្ងាចនេះ សម្រាប់ការប្រកួតសប្តាហ៍ទី១៩ នៃជម្រើសជើងឯកខេមបូឌាព្រីមៀរលីគ ២០២២ ជុំទី៣ ដែលផ្សាយផ្ទាល់ដោយ«កម្ពុជាថ្មី»។

សម្រាប់ក្រុមណាហ្គាវើលដ៍កំពុងមានស្មារតីប្រយុទ្ធ និងសមាជិកពេញជើងល្អណាស់ ដោយសារកីឡាករសំខាន់ៗរបស់ពួកគេជាសះស្បើយពីរបួស និងរួចផុតពិន័យអស់ហើយ។ ជាងនេះទៀតនោះ ក្រុមនេះទើបតែបើកសម្ពោធកីឡដ្ឋានផ្ទាល់ខ្លួនថ្មីនៅខេត្តកំពង់ស្ពឺ និងយកឈ្នះគិរីវង់សុខសែនជ័យដោយលទ្ធផល ២-០ លើទីលានថ្មី ដូច្នេះពួកគេពោរពេញដោយកម្លាំងចិត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន កីឡការ៦នាក់របស់ព្រះខ័នរាជស្វាយរៀងលេងទាំងឈឺ និង៣នាក់ទៀតឈឺក្នុងថ្ងៃប្រកួត។ ចំណែកអ្នករកគ្រាប់បាល់បានច្រើនជាងគេបច្ចុប្បន្នគឺ Marcus មិនបានហ្វឹកហាត់ឡើយកាលពីសប្តាហ៍មុនដោយសារបួស ដូច្នេះពិតជាធ្វើឲ្យលោកឈឺក្បាលដោយសារកីឡាករច្រើនកំពុងឈឺ។ ទោះបីជាយ៉ាងណា កីឡកររបស់លោកនឹងត្រឡប់មកជាទាន់ពេលវេលាច្រើនតាមអាចធ្វើទៅបាន ហើយ ហើយក្រុមរបស់លោកនឹងខំប្រឹងប្រែងឲ្យខ្លាំងបំផុត។

បើនិយាយពីប្រវត្តិជួបគ្នា៤លើកចុងក្រោយ ណាហ្គាវើលដ៍មិនធ្លាប់ឈ្នះព្រះខ័នរាជស្វាយរៀងឡើយ។ រដូវកាល២០២១ ជើងទី១ ណាហ្គាវើលដ៍ ចាញ់ ព្រះខ័នរាជស្វាយរៀង ០-១ និងជើងទី២ស្មើគ្នា ១-១។ ក្នុងរដូវកាល២០២២នេះ ណាហ្គាវើលដ៍ចាញ់ព្រះខ័នរាជស្វាយរៀងទាំងពីរជើងគឺ ជើងទី១ ព្រះខ័នរាជស្វាយរៀងឈ្នះ ១-២ និងជើងទី២ឈ្នះ ៣-១។

សម្រាប់ការប្រកួតល្ងាចនេះជាការជួបគ្នាលើកទី៥ក្នុងរយៈពេល២ឆ្នាំចុងក្រោយ ហើយរាល់ការប្រកួតតែងតែមានគ្រាប់បាល់ធ្លាយសំណាញ់ទីគ្នារហូត។

ឆ្លងកាត់ការប្រកួត១៨សប្តាហ៍កន្លងទៅ ព្រះខ័នរាជស្វាយរៀង ឈ្នះ១៣ ស្មើ៣ និងចាញ់២មាន៤២ពិន្ទុ កំពុងឈរលើកំពូលតារាង ខណៈណាហ្គាវើលដ៍ ឈ្នះ៦ ស្មើ៥ និងចាញ់៧ មាន២៣ពិន្ទុ កំពុងឈរលេខ៥ក្នុងតារាង៕

អត្ថបទ៖ វីរបុត្រ