កីឡា

៣ ចំណុច លោក Conor Nestor លើកឡើងមុនជួប បឹងកេត ចុងសប្ដាហ៍នេះ

បានផុស

៤ years មុន

នៅ

ថ្ងៃព្រហស្បតិ៍ ២៧ តុលា ២០២២

ដោយ

គ្រូបង្វឹក នៃក្លិបបាល់ទាត់ព្រះខ័នរាជស្វាយរៀង លោក Conor Nestor បានបង្ហើបឲ្យដឹងថា ជួបបឹងកេត នឹងក្លាយជាការប្រកួតដ៏តានតឹង ក្នុងជំនួបសប្ដាហ៍ទី ២២ វគ្គ ៤ ក្រុមក្រោយ ដែលជាសប្ដាហ៍ដំបូង នៃជុំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀង, វិសាខា, ភ្នំពេញក្រោន និងបឹងកេត គឺជាក្រុមកំពូលទាំង ៤ ដែលបានកៅអីប្រកួតវគ្គ ៤ ក្រុមចុងក្រោយ. ឬអាចនិយាយដោយស្រួលគឺជាវគ្គដែលប្រកួតដណ្ដើមជើងឯកតែម្ដង ដោយក្រុមទាំង ៤ ត្រូវជួបគ្នាចំនួន ២ ជើងទៀត សរុបម្នាក់ ៦ ប្រកួត។ ហើយចាប់ផ្ដើមដំបូង ព្រះខ័នរាជស្វាយរៀង ត្រូវមកលេងផ្ទះរបស់បឹងកេត ដែលដើមឡើយត្រូវប្រកួតនៅខេត្តស្វាយរៀង។

លោក Conor Nestor បានឲ្យដឹងដូច្នេះថា «វាជាការប្រកួតធំមួយ ដោយក្រុមជើងឯកឆ្នាំ ២០១៩ ត្រូវលេងទល់នឹងក្រុមជើងឯកឆ្នាំ ២០២០។ វាតែងតែជាការប្រកួតដ៏តានតឹងមួយ នៅពេលយើងលេងនៅកីឡដ្ឋានខេមបូឌាអ៊ែវ៉េ ហើយពួកយើងរំពឹងថា វាជាការប្រកួតដ៏ពិបាកមួយទៀតសម្រាប់យើង»។

គ្រូបង្វឹកសញ្ជាតិអៀរឡង់ខាងជើង ក៏បានបញ្ជាក់ពីបញ្ហាកីឡាករផងដែរ ដោយមានកីឡាករច្រើនដែលកំពុងឈឺដោយសារតែបញ្ហាអាកាសធាតុ ពោលគឺលោកថាមានកីឡាករ ៤ នាក់ ដែលនឹងត្រូវអវត្តមានដោយសារតែគ្រុនឈឺ។

ចុងក្រោយលោកក៏បានផ្ញើសារទៅកាន់អ្នកគាំទ្រថា «ពិតណាស់ ដំបូងឡើយយើងត្រូវលេងនៅស្វាយរៀងនៅជុំបន្ទាប់ អញ្ចឹងហើយវាមិនមែនជាការលុបការប្រកួតនៅក្នុងផ្ទះយើងទេ។ អ្នកគាំទ្រតែងតែនៅលេខរៀងទី ១ ប៉ុន្តែការដែលយើងប្រកួតនៅក្រោមភាពមិនស្មើភាពគ្នាចំពោះស្ថានភាពបែបនេះ វាធ្វើឲ្យបាត់បង់តម្លៃ នៃក្លិប។ ការលេងដោយភាពស្មើភាពគ្នា និងស្មារតីកីឡា ត្រូវតែគោរពតាមដូចគ្នា»។

គួររំលឹកថា ៣ ប្រកួតចុងក្រោយរវាងព្រះខ័នរាជស្វាយរៀង ជាមួយ បឹងកេត នៅឆ្នាំ ២០២២ នេះ គឺបឹងកេត មិនដែលយកឈ្នះព្រះខ័នរាជស្វាយរៀងឡើយ ពោលគឺ ជើងទី ១ ស្វាយរៀង ឈ្នះ ៤-០, ជើងទី ២ ស្វាយរៀង បន្តឈ្នះ ០-១ និងជើងទី ៣ ស្មើគ្នា ២-២៕

អត្ថបទ ៖ មន្នីរ័ត្ន