គ្រូ​​ថៃ​​ថា​ ​ឥណ្ឌូនេស៊ី​ ដែល​​ប៉ះ​​កម្ពុជា​​ល្ងាច​​នេះ​​ ​គួរ​​ឲ្យ​ខ្លាច​​ជាង​​គេ​​ក្នុង​​ពូល​ A

គ្រូ​បង្គោល​ក្រុម​បាល់ទាត់​ជម្រើស​ជាតិ​ថៃចាត់​ទុក​​​ជម្រើស​ជាតិ​ឥណ្ឌូនេស៊ី​​ជា​ក្រុម​គួរ​ឲ្យ​ខ្លាច​ជាង​គេ​បំផុតក្នុង​ពូល A នៃ​​ព្រឹត្តិការណ៍ AFF Championship ឆ្នាំ​២០២២​នេះ ខណៈ​ឥណ្ឌូនេស៊ី​បើក​ឆាក​ប៉ះ​កម្ពុជា វេលា​ម៉ោង​៤:៣០​នាទី​ល្ងាច ថ្ងៃ​សុក្រ ទី​២៣ ខែ​ធ្នូ​នេះ។​

ក្រុម​ជម្រើស​ជាតិ​ថៃ​ស្ថិត​នៅ​ក្នុង​ពូល A ជា​មួយ ឥណ្ឌូនេស៊ី ​កម្ពុជា ហ្វីលីពីន និង​ព្រុយណេ។ ​ថ្ងៃ​បើក​ឆាក កម្ពុជា​ទទួល​បាន​៣​ពិន្ទុ​ពី​ការ​ឈ្នះ​ហ្វីលីពីន ៣-២ កំពុង​ឈរ​លេខ​២​ក្នុង​ពូល​ ខណៈ​ថៃ​លត់​ព្រុយណេ ៥-០ ឈរ​លើ​កំពូល​តារាង។

ជា​ក្រុម​រួម​ពូល​ជា​មួយ​គ្នា​នេះ លោក Alexandre Mano Polking គ្រូ​បង្គោល​ជម្រើស​ជាតិ​ថៃ បានទទួល​ស្គាល់​ថា ឥណ្ឌូនេស៊ី ជា​ក្រុម​គួរ​ឲ្យ​បារម្ភ​ជាង​គេ​ក្នុង​ពូល A។ លោក​បាន​និយាយ​​​ថា ៖«ឥណ្ឌូនេស៊ី​ជា​ក្រុម​គ្រោះ​ថ្នាក់ និង​គួរ​ឲ្យ​បារម្ភ​ជាង​គេ​បំផុត​នៅ​ក្នុង​ពូល​ជា​មួយ​យើង»។ តាម​ពិត​ទៅ​លោក​បាន​ដឹក​នាំ​ក្រុម​ថៃ​ឲ្យ​ឈ្នះ​ឥណ្ឌូនេស៊ី វគ្គ​ផ្តាច់​ព្រ័ត្រ​កាល​ពី​ឆ្នាំ​២០២១។

កាល​ព្រឹត្តិការណ៍ AFF Championship ឆ្នាំ​២០២១​កន្លង​ទៅ ថៃ និង​ឥណ្ឌូនេស៊ី ជួប​គ្នា​ពីរ​ដង​ក្នុង​វគ្គ​ផ្តាច់​ព្រ័ត្រ។​ ជើង​ទី​១នៅ​ទឹក​ដី​របស់​ឥណ្ឌូនេស៊ី ថៃ​បាន​​ឈ្នះ​ ៤-២ និង​ជើង​ទី​២ ក្នុង​ដី​របស់​ខ្លួន​ស្មើ​គ្នា ២-២ ដើម្បី​ក្លាយ​ជា​ជើង​ឯក​ឆ្នាំ​២០២១។ ​

សម្រាប់​ឆ្នាំ​២០២២​នេះ ​ឥណ្ឌូនេស៊ី​​ បាន​ឆ្លង​កាត់​ការ​ប្រកួត​៩​​​លើកហើយ​ ក្នុង​នោះ​ឈ្នះ​៦ ស្មើ​២ និង​ចាញ់​​តែ​១​។

-ថ្ងៃ​ទី១ មករា៖ ថៃ ២-២ ឥណ្ឌូនេស៊ី (​ផ្តាច់​ព្រ័ត្រ AFF Championship)
-ថ្ងៃ​ទី២៧ មករា៖ ឥណ្ឌូនេស៊ី ៤-១ ទីម័រ​ខាង​កើត (មិត្តភាព)
-ថ្ងៃ​ទី៣០ មករា៖ ទីម័រ​ខាង​កើត ០-៣ ឥណ្ឌូនេស៊ី (មិត្តភាព)
-ថ្ងៃ​ទី១ មិថុនា៖ ឥណ្ឌូនេស៊ី ០-០ បង់ក្លាដែស (មិត្តភាព)
-ថ្ងៃ​ទី៨ មិថិនា៖ គុយវ៉ែត ១-២ ឥណ្ឌូនេស៊ី (ជម្រុះ Asian Cup)
-ថ្ងៃ​ទី១១ មិថុនា៖ ឥណ្ឌូនេស៊ី ០-១ ហ៊្សកដានី (ជម្រុះ Asian Cup)
-ថ្ងៃ​ទី១៤ មិថុនា៖ ឥណ្ឌូនេស៊ី ៧-០ នេប៉ាល់ (ជម្រុះ Asian Cup)
-ថ្ងៃ​ទី២៤ កញ្ញា៖ ឥណ្ឌូនេស៊ី ៣-២ Curaçao (មិត្តភាព)
-ថ្ងៃ​ទី២៧ កញ្ញា៖ Curaçao ២-១ ឥណ្ឌូនេស៊ី (មិត្តភាព)

អត្ថបទ៖ វីរបុត្រ