Preview៖ កម្ពុជា និងថៃ​ មុនជួបគ្នាប្រកួតចុងក្រោយពាន AFF Cup ល្ងាចនេះ

កម្ពុជា នឹងសម្លឹងរកកំណត់ត្រាដ៏ធំបំផុតមួយក្នុងប្រវត្តិសាស្ត្រ AFF Championship នៅពេលដែលត្រូវប៉ះក្រុមការពារតំណែងជើងឯកថៃ នៅកីឡដ្ឋាន Thammasat នាល្ងាចថ្ងៃចន្ទ ទី០២ ខែមករា ឆ្នាំ២០២៣ នេះ។

ជាមួយនឹងការប្រកួតនៅសល់ ១ប្រកួតក្នុងពូល A ថៃ កំពុងនាំមុខគេលើគ្រាប់បាល់ស៊ុតបញ្ចូលទី ជាមួយឥណ្ឌូណេស៊ី ប៉ុន្តែកម្ពុជា ត្រូវការតែពិន្ទុប៉ុណ្ណោះ ដោយការទទួលជ័យជម្នះលើថៃ នឹងធ្វើឱ្យក្រុមបានឈានទៅវគ្គពាក់កណ្តាលផ្តាច់ព្រ័ត្រ ជាលើកដំបូង។

ដឹកនាំដោយអ្នកបច្ចេកទេសជប៉ុន លោក Ryu Hirose គ្រូបង្វឹក រួមជាមួយអ្នកចាត់ការទូទៅ Keisuke Honda​ កម្ពុជាបានរីករាយជាមួយយុទ្ធនាការ AFF Mitsubishi Electric Cup 2022 រហូតមកដល់បច្ចុប្បន្ន ដោយបង្កើតបាននូវទម្រង់លេងល្អបំផុតនៅក្នុងការប្រកួត។

ការទទួលជ័យជម្នះក្នុងលទ្ធផល ៣-២ លើហ្វីលីពីន ក្នុងថ្ងៃបើកឆាកនៅពហុកីឡដ្ឋានជាតិមរតកតេជោ គឺជាជ័យជម្នះដ៏ល្អបំផុតក្នុងប្រវត្តិសាស្ត្រនៃពានរង្វាន់នេះ មុនពេលដែលបានចាញ់ក្រុមគីឡូធ្ងន់នៅអាស៊ាន ឥណ្ឌូនេស៊ី ២-១ វិញ ក្នុងទីក្រុងហ្សាកាតា ដែលជាភស្តុតាងបន្ថែមទៀតនៃការបន្តធ្វើឱ្យប្រសើរឡើងរបស់ក្រុម នៅក្រោមការដឹកនាំដោយ​លោក​ Hirose និងលោក Honda ។

ក្រុមគោព្រៃកម្ពុជា បានភ្លាត់របូតគ្រាប់បាល់មុន ១គ្រាប់ពីព្រុយណេ ក្នុងការប្រកួតលើកទី៣ របស់ខ្លួន ប៉ុន្តែបានវាយបកវិញដើម្បីឈ្នះ ៥-១ តាមពីក្រោយគ្រាប់បាល់ដោយ ជួន ច័ន្ទចាវ, នីកូឡាស ថេល័រ,​ កែវ សុខផេង​ និង លឹម ពិសិដ្ឋ​២គ្រាប់ ខណៈដែលរកបាន ២លើកក្នុងចំណោម ៣ប្រកួត។

លទ្ធផលនេះមិនទាន់ធានាបានថាដណ្តើមបានជ័យជម្នះ និងពិន្ទុកាន់តែច្រើន និងស៊ុតបញ្ចូលទីបានច្រើនជាងមុនក្នុងព្រឹត្តិការណ៍ AFF Championship នោះទេ វាក៏មានន័យថាកម្ពុជាឈានទៅប្រកួតចុងក្រោយជាមួយនឹងក្រុមថៃ​ដោយដឹងថាប្រសិនបើឈ្នះ នោះអាចនឹងឡើងទៅវគ្គពាក់កណ្តាលផ្តាច់ព្រ័ត្រ។

សម្រាប់ម្ចាស់ផ្ទះ សមីការសាមញ្ញបំផុតគឺ ‘ឈ្នះ’ នោះនឹងបានកៅអីវគ្គពាក់កណ្តាលផ្តាច់ព្រ័ត្រ ខណៈពេលដែលលទ្ធផលស្មើក៏នឹងធានាបាននូវលទ្ធផលដូចគ្នាដែរ ប៉ុន្តែ ក្រុមរបស់លោក Mano Polking ប្រាកដជាមានបំណងសម្រាប់តំណែងកំពូលតារាងក្នុងពូល ដើម្បីជៀសវាងការប្រកួតពិបាកក្នុងវគ្គ ៤ក្រុមចុងក្រោយ។ ការចាញ់ រួមជាមួយនឹងការឈ្នះ ឬការស្មើសម្រាប់ឥណ្ឌូនេស៊ី ក្នុងការប្រកួតក្នុងពូល B ផ្សេងទៀតនោះ នឹងធ្វើឱ្យដំរីសឹកថៃ ធ្លាក់ចេញពីការប្រកួត។ ថៃ គេលេង ៣ប្រកួតឈ្នះ ២ប្រកួត និងស្មើ ១ប្រកួត ទល់ឥណ្ឌូនេស៊ី ដែលទើបតែបញ្ចប់កាលពីសប្ដាហ៍មុន។

គួរឱ្យភ្ញាក់ផ្អើល នេះជាលើកទី១ ហើយដែលប្រទេសទាំង ២ បានប៉ះគ្នានៅក្នុងពានរង្វាន់ AFF Championship ​ហើយក្រុមទាំងសងខាងដឹងថាអាចចាប់ផ្តើមសរសេរជំពូកថ្មីក្នុងប្រវត្តិសាស្ត្របាល់ទាត់របស់ប្រទេសរៀងៗខ្លួនជាមួយនឹងជ័យជម្នះដើម្បីបិទនូវអ្វីដែលជាការប្រកួតវគ្គចែកពូលដ៏ជក់ចិត្តនេះ។

បញ្ជាក់ថា ការប្រកួតរវាងក្រុមទាំងពីរនឹងធ្វើឡើងនៅវេលាម៉ោង ៧:៣០នាទីយប់ ខណៈប្រកួតនេះនឹងមានផ្សាយបន្តផ្ទាល់តាមរយៈកញ្ចក់ទូរទស្សន៍ BTV News ផងដែរ៕

អត្ថបទ៖ មន្នីរ័ត្ន