ពាន FIFA Club World Cup ឆ្នាំ ២០២២ នឹងចាប់ផ្ដើមនៅយប់ថ្ងៃពុធនេះហើយ

ការ​ប្រកួត​ពានរង្វាន់​ក្លិប​បាល់ទាត់​ពិភពលោក (FIFA Club World Cup) ឆ្នាំ ២០២២ ធ្វើឡើង​នៅ​ប្រទេស​ម៉ា​រ៉ុ​ក នឹង​ចាប់ផ្ដើម​នៅ​យប់​ថ្ងៃ​ពុធ ឈាន​ចូល​ថ្ងៃ​ព្រហស្បតិ៍ (​នៅ​កម្ពុជា​) ជាមួយ​នឹង​ការ​ប្រកួត​ជុំ​ទី ១ រវាង​ក្លិប Al Ahly និង​ក្លិប Auckland City។

ការ​ប្រកួត​ពានរង្វាន់​ក្លិប​បាល់ទាត់​ពិភពលោក (Club World Cup) បណ្ដុំ​ទៅ​ដោយ​ក្រុម​ឈ្នះ​ប្រចាំ​ទ្វីប​ទាំង ៦ រួម​ទាំង ក្រុម​ការពារ​ជើងឯក UEFA Champions League ក្លិប​ស្រមោល​ស Real Madrid និង​ម្ចាស់​ជើងឯក​របស់​ប្រទេស​ម្ចាស់ផ្ទះ។

ការ​ប្រកួត​បាល់ទាត់ នឹង​ដំណើរការ​រហូតដល់​ថ្ងៃ​ទី ១១ ខែ​កុម្ភៈ ហើយ​ការ​ប្រកួត នឹង​ត្រូវ​លេង​នៅ​ទីក្រុង Rabat និង Tangier។

ការ​ប្រកួត​ដំបូង​រវាង ក្លិប Al Ahly របស់​ប្រទេស​អេ​ហ្ស៊ី​ប (​ជើងឯក​ក្លិប​ទ្វីប​អាហ្វ្រិក​) នឹង​ប៉ះ​ជាមួយ​ក្លិប Auckland City នៃ​ប្រទេស​នូ​វែ​ល​សេ​ឡង់ (​ជើងឯក​ក្លិប​ទ្វីប​អូសេអានី​) នឹង​ចាប់ផ្ដើម​នៅ​ម៉ោង ២ និង ០០ នាទី​យប់​ថ្ងៃ​ពុធ ឈាន​ចូល​ថ្ងៃ​ព្រហស្បតិ៍ (ម៉ោង​នៅ​កម្ពុជា) នៅ​ទីក្រុង Tangier។

ក្រុម​ដែល​ឈ្នះ​ក្នុង​ដំណាក់កាល​ទី ១ ទាំង Al Ahly ឬ Auckland City នឹង​ត្រូវ​ជួប​ជាមួយ​ក្លិប US Seattle Sounders របស់​អាមេរិក (​ជើងឯក​ក្លិប​ទ្វីប​អាមេរិក​ខាងជើង​) ក្នុង​ការ​ប្រកួត​ជុំ​ទី ២ នៅ​ថ្ងៃ​សៅរ៍។

ដោយឡែក ក្លិប Wydad Athletic Club (របស់​ម៉ា​រ៉ុ​ក​) នឹង​ប្រកួត​ជាមួយ ក្លិប Al Hilal របស់​អា​រ៉ា​ប៊ី​សា​អូឌីត (​ជើងឯក​ក្លិប​ទ្វីប​អាស៊ី​) ក្នុង​ជុំ​ទី ២ នៅ​ថ្ងៃ​ជាមួយគ្នា។

Wydad បាន​ឈ្នះ​ទាំង​លីគ​ម៉ា​រ៉ុ​ក និង CAF Champions League ក្នុង​ឆ្នាំ ២០២២ ដើម្បី​មាន​សិទ្ធិ​ទទួល​បាន​ពានរង្វាន់ Club World Cup ដោយ​ស្វ័យប្រវត្តិ មានន័យ​ថា ក្រុម Al Ahly ដែល​ឡើង​វគ្គ​ផ្ដាច់ព្រ័ត្រ នៃ CAF Champions League បាន​យក​កៅអី​របស់​ម្ចាស់ផ្ទះ​ម៉ា​រ៉ុ​ក។

ការ​គ្រង​តំណែង​ជើងឯក​ទ្វីប​អាមេរិក​ខាងត្បូង (Copa CONMEBOL Libertadores) ក្រុម Flamengo (​របស់​ប្រេ​ស៊ី​ល​) និង​ម្ចាស់​ជើងឯក UEFA Champions League ក្រុម Real Madrid (​អេ​ស្ប៉ា​ញ​) នឹង​រង់ចាំ​ការ​ប្រកួត Club World Cup ក្នុង​វគ្គ​ពាក់កណ្ដាល​ផ្ដាច់ព្រ័ត្រ។

វគ្គ​ពាក់កណ្ដាល​ផ្ដាច់ព្រ័ត្រ នឹង​ធ្វើ​ឡើង​នៅ​ថ្ងៃ​ទី ០៧ និង ០៨ ខែ​កុម្ភៈ។ ការ​ប្រកួត នឹង​បញ្ចប់​ជាមួយ​នឹង​វគ្គ​ផ្ដាច់ព្រ័ត្រ​នៅ​ថ្ងៃ​ទី ១១ ខែ​កុម្ភៈ។

គួរ​រំលឹក​ថា Real Madrid បាន​ចូលរួម​ប្រកួត​ពាន Club World Cup ចំនួន ៦ លើក ដោយ​ឈ្នះ​ពាន​ក្នុង​ឆ្នាំ ២០១៤, ២០១៦, ២០១៧ និង ២០១៨។

Chelsea របស់​អង់គ្លេស គឺជា​ក្រុម​ការពារ​តំណែង​ជើងឯក Club World Cup ឆ្នាំ ២០២១ ប៉ុន្តែ​ពួកគេ​មិន​អាច​ការពារ​ជើងឯក​របស់​ពួកគេ​នៅ​ក្នុង​ប្រទេស​ម៉ា​រ៉ុ​ក​បាន​នោះ​ទេ៕

អត្ថបទ ៖ មន្នីរ័ត្ន