កីឡា

ប្រធាន FIFA ផ្ញើសារអបអរដល់ក្លិបភ្នំពេញក្រោន ក្នុងឱកាសឈ្នះលីគកំពូលកម្ពុជា ២០២២

បានផុស

៣ years មុន

នៅ

ថ្ងៃពុធ ១ កុម្ភៈ ២០២៣

ដោយ

ប្រធានសហព័ន្ធបាល់ទាត់ពិភពលោក (FIFA) លោក Gianni Infantino បានផ្ញើលិខិតអបអរសាទរក្លិបបាល់ទាត់ភ្នំពេញក្រោន ដែលទើបតែឈ្នះជើងឯកលីគកំពូលកម្ពុជា កាលពីចុងឆ្នាំ ២០២២ កន្លងទៅថ្មីៗ។ នេះត្រូវបានដឹងថា គឺជាទម្លាប់របស់ប្រធានសហព័ន្ធបាល់ទាត់ពិភពលោក (FIFA) ដែលតែងតែផ្ញើលិខិតអបអរដល់ក្លិបគ្រប់បណ្ដាប្រទេសទាំងអស់ ក្រោយសម្រេចសមិទ្ធផលយ៉ាងត្រចះត្រចង់ក្នុងលីគបាល់ទាត់ជាតិរៀងៗខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកលិខិតអបអរដល់ក្លិបភ្នំពេញក្រោន នេះ ត្រូវបានផ្ញើតាមរយៈ លោកនាយឧត្ដមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា ខណៈប្រមុខបាល់ទាត់ពិភពលោករូបនេះ បានថ្លែងថា «ពាននេះមិនអាចសម្រេចបានទេបើគ្មានការខិតខំប្រឹងប្រែង ទឹកចិត្ត និងការលះបង់របស់ក្រុមទាំងមូល ហើយគ្រប់គ្នានៅក្នុងក្លិបអាចមានមោទនភាពយ៉ាងខ្លាំង។ សូមចូលរួមអបអរសាទរដល់អ្នកទាំងអស់គ្នាដែលចូលរួមក្នុងសមិទ្ធផលដ៏អស្ចារ្យនេះ»។

«ក្នុងនាមសហគមន៍កីឡាបាល់ទាត់ទាំងមូល ខ្ញុំក៏ឆ្លៀតក្នុងឱកាសនេះផងដែរ ដើម្បីថ្លែងអំណរគុណចំពោះក្លិប និងសហព័ន្ធ ចំពោះការរួមចំណែករបស់អ្នកក្នុងការអភិវឌ្ឍ និងវិបុលភាព នៃកីឡាបាល់ទាត់នៅកម្ពុជា និងក្នុងតំបន់»។ លោក Gianni Infantino បានសង្កត់ធ្ងន់។

គួររំលឹកថា ភ្នំពេញក្រោន បានគ្រងជើងឯកលីគកំពូលកម្ពុជា រដូវកាល ២០២២ ដោយមិនគួរឲ្យជឿ ដ្បិតក្នុងការប្រកួតពាក់កណ្ដាលរដូវកាលត្រូវបានក្រុមកំពូលតារាងនាំមុខដល់ទៅជាង ១៨ ពិន្ទុទៅហើយ ប៉ុន្តែនៅជុំចុងក្រោយ ឬជុំក្រុមខ្លាំងទាំង ៤ (Top 4) ភ្នំពេញក្រោន បានយកឈ្នះជាបន្តបន្ទាប់រហូតដល់គ្រងជើងឯក តាមរយៈការឈ្នះលើរូបមន្ត Head to head ជាមួយក្លិបវិសាខា៕

អត្ថបទ ៖ មន្នីរ័ត្ន