កីឡា

យប់នេះ ធឿន ធារ៉ា ប្រាប់ថា ប៉ះ Sammy លើកទី២ប្រហែលមិនចប់៥ទឹក

បានផុស

៣ years មុន

នៅ

ថ្ងៃសៅរ៍ ១៨ មីនា ២០២៣

ដោយ

អ្នកលេងគុនខ្មែរ ធឿន ធារ៉ា នឹងប៉ះអ្នកលេងឆ្លងដែនថៃ Sammy យប់ថ្ងៃសៅរ៍ ទី១៨ ខែមីនានេះ ដើម្បីជម្រះបញ្ជីឲ្យស្រឡះថាតើ នរណាជើងខ្លាំងលើសង្វៀនពិតប្រាកដក្នុងប្រភេទទម្ងន់៧២គីឡូក្រាម។

នេះជាការជួបគ្នាលើកទី២ បន្ទាប់ពីលើកទី១ អ្នកខ្លាហានលើសង្វៀនគុនខ្មែរទាំងពីរបានបញ្ចប់៥ទឹកដោយលទ្ធផលស្មើគ្នា។ ការប្រកួតនោះ កីឡាករថៃ Sammy យល់ឃើញខ្លួនឯងថា មានប្រៀប និងអាចឈ្នះ ប៉ុន្តែចៅក្រមកាត់សេចក្តីឲ្យស្មើគ្នា។

លទ្ធផលស្មើនោះធ្វើឲ្យ Sammy មិនអស់ចិត្តទេ ជាពិសេសបន្ទាប់ពីរូបគេបានផ្តួលជើងខ្លាំង ឡៅ ចន្ទ្រា ក្នុងទឹកទី២ និងផ្តួល ធន់ រិទ្ធី ក្នុងទឹកទី១ ហើយដាក់គោលបំណងជម្រះបញ្ជីជាមួយ ធឿន ធារ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយថ្លឹងទម្ងន់ស្មើគ្នាល្អកាលពីម្សិលមិញ ធឿន ធារ៉ា បានប្រាប់ថា កាលប្រកួតជាមួយ Sammy លើកទី១ អ្នកគាំទ្រមើលខ្លួនលេងសើចច្រើនបន្តិច ប៉ុន្តែការប្រកួតនោះរូបគេបានខំប្រឹងអស់ពីសមត្ថភាពហើយពោលគឺមិនលាក់អាវុធឬកម្លាំងទុកឡើយ។ ពេលជួបគ្នាដំបូង រូបគេមិនទាន់ស្គាល់សមត្ថភាពរបស់ Sammy ច្រើនទេ។

សម្រាប់ការជួបគ្នាលើកទី២នេះ ធារ៉ា មានអារម្មណ៍ថា ប្រហែលជាមិនចប់៥ទឹកទេ ដោយសារតែម្នាក់ៗមានឆន្ទៈជម្រះបញ្ជីចាស់ឲ្យស្រឡះរៀងៗខ្លួន ហើយម្យ៉ាងទៀត ក៏ស្គាល់សមត្ថភាពគ្នាទៅវិញទៅមកច្រើនដែរ ដូច្នេះប្រហែលមិនស្ទាបស្ទង់ច្រើនឡើយ។

មួយរយៈពេលចុងក្រោយនេះ ធឿន ធារ៉ា បានប្រើកណ្តាប់ដៃច្រើនដែលហាក់ដូចជាខុសប្លែកពីមុនៗដែលរូបគេត្រូវបានគេស្គាល់ថាជា អ្នកលេងកែងពិឃាត។ យ៉ាងណា រូបគេ ប្រាប់ថា តាមពិតទៅ កែងពិឃាតរបស់ខ្លួននៅតែប្រើដូចមុន ប៉ុន្តែការចេញកណ្តាប់ដៃច្រើននេះជាយុទ្ធសាស្ត្រមួយ។ នៅពេលចេញកណ្តាប់ដៃច្រើនធ្វើឲ្យដៃគូភ្លេចខ្លួនអាចជាឱកាសដែលរូបគេវ៉ៃកែង។

សូមបញ្ជាក់ថា ធឿន ធារ៉ា ប៉ះ Sammy លើកទី២ យប់ថ្ងៃសៅរ៍នេះ នៅក្រុងប៉ោយប៉ែត ខេត្តបន្ទាយមានជ័យ ផ្សាយផ្ទាល់ដោយទូរទស្សន៍ជាតិកម្ពុជា៕

អត្ថបទ៖ វីរបុត្រ