ថៃសម្រេច​ដាក់ពិន័យកីឡាករ និង​​អ្នក​ពាក់​ព័ន្ធ​ការ​ប៉ះ​ទង្គិច​ជាមួយ​ឥណ្ឌូណេស៊ី

សមាគមកីឡាបាល់ទាត់ថៃ ​បាន​ប្រកាសពិន័យបុគ្គលិក គ្រូបង្វឹក មន្ត្រីក្រុម និងកីឡាករជម្រើសជាតិថៃ តាមសំណើរបស់គណៈកម្មការ​ស៊ើបអង្កេតក្រមសីលធម៌ ក្នុងករណីមានបញ្ហាក្នុងការប្រកួតបាល់ទាត់ជម្រើសជាតិថៃ ក្នុង​កីឡាស៊ីហ្គេម លើកទី៣២ ឆ្នាំ២០២៣ វិញ្ញាសាបាល់ទាត់បុរស ដែលជាការប្រកួតចុងក្រោយរវាងក្រុមជម្រើសជាតិថៃ និងក្រុមជម្រើសជាតិឥណ្ឌូណេស៊ី នៅថ្ងៃទី១៦ ខែឧសភា ឆ្នាំ២០២៣ នៅរាជធានីភ្នំពេញ។

គណៈកម្មការ​ស៊ើបអង្កេតការពិត ដឹកនាំដោយលោកឧត្តមសេនីយទោ Amnuay Nimmano បាន និងកំពុងស៊ើបអង្កេតតាំងពីថ្ងៃទី១៨ ខែឧសភា ឆ្នាំ២០២៣ ហើយបានបញ្ចប់នៅថ្ងៃទី២២ ខែឧសភា ឆ្នាំ២០២៣។

គណៈកម្មការបានសម្រេចដាក់ពិន័យលោក Prasukchok Chokmoh គ្រូបង្គោលអ្នកចាំទី, លោក Mayed Madada មន្ត្រីក្រុម និងលោក Phatrawut Wongsripuek មន្ត្រីក្រុម ដោយផ្អាកពីការបំពេញភារកិច្ចក្នុងនាមក្រុមជម្រើសជាតិថៃ ម្នាក់ៗរយៈ​ពេល១ឆ្នាំ។

ចំណែកកីឡាករក៏មាន ២នាក់ផងដែររួមមាន អ្នកចាំទី Sophonwit Rakyat និងកីឡាករ Teerapak Pruengna ត្រូវព្យួរកាតព្វកិច្ច (ចូលរួមក្នុងការប្រកួត) ក្នុងនាមក្រុមជម្រើសជាតិថៃ គ្រប់ឈុតសម្រាប់រយៈពេល៦ខែ៕

អត្ថបទ៖ មន្នីរ័ត្ន