កីឡា

កីឡាការិនីឆ្នើម ស្រួង ភាវី ធ្វើទូតសុច្ឆន្ទៈឲ្យក្រុមហ៊ុនមួយដើម្បីជួយអ្នកខ្វះខាត

បានផុស

៣ years មុន

នៅ

ថ្ងៃអង្គារ ៣០ ឧសភា ២០២៣

ដោយ

កីឡាការិនីស្នូកឃ័រ និងប៊ីយ៉ាដ៏ឆ្នើមរបស់កម្ពុជា ស្រួង ភាវី បានទទួលការងារជាទូតសុច្ឆន្ទៈឲ្យក្រុមហ៊ុនឯកជនមួយដោយមិនទទួលយកប្រាក់ចំណូលដើម្បីផលប្រយោជន៍ផ្ទាល់ខ្លួនទេ ប៉ុន្តែដើម្បីការងារសប្បុរសធម៌ដល់អ្នកខ្វះខាត។

ម្ចាស់មេដាយមាសស៊ីហ្គេម ឆ្នាំ២០២៣ ស្រួង ភាវី បានប្រកាសថា ខ្លួនបានចុះកុងត្រាធ្វើជាទូតសុច្ឆន្ទៈឲ្យក្រុមហ៊ុនអាកាសចរណ៍ស្កាយអង្គរដើម្បីស្វែងរកផលប្រយោជន៍សម្រាប់កិច្ចការងារសប្បុរសធម៌របស់អ្នកនាង។

«ការចុះកុងត្រានេះ ខ្ញុំមិនយកប្រាក់សម្រាប់ខ្លួនឯងទេ គឺខ្ញុំបានបង្វិលទៅជាកិច្ចការសប្បុរសធម៌វិញ។ គឺថាប្រសិនបើខ្ញុំត្រូវមានកិច្ចការសប្បុរសធម៌ត្រូវធ្វើ ឬមានប្អូនៗ ក៏ដូចជាប្រជាជនខ្មែរយើងដែលមានជីវភាពខ្វះខាត ហើយត្រូវបានអង្គការសប្បុរសធម៌របស់នាងខ្ញុំធានាពួកគាត់មកព្យាបាលជំងឺនៅប្រទេសកូរ៉េ គឺមិនតម្រូវឱ្យយកប្រាក់ពីពួកគាត់ឡើយ»។ ស្រួង ភាវី បានរៀបរាប់។

កីឡាការិនីដើមកំណើតខេត្តត្បូងឃ្មុំរូបនេះបន្ថែមថា អ្នកនាងមានតែខ្លួនមួយ ដូច្នេះរាល់កិច្ចការដែលទទួលគឺជាអម្រែកដ៏ធំធេង ប៉ុន្តែការលះបង់ទាំងប៉ុន្មានរបស់អ្នកនាងគឺមានតម្លៃធំធេងសម្រាប់ប្រទេសជាតិ និងប្រជាជនកម្ពុជា ទើបធ្វើឲ្យអ្នកនាងទទួលទាំងស្នាមញញឹម បើទោះជាដឹងថា វាជាអម្រែកដ៏ធំក៏ដោយ។

ស្រួង ភាវី ទើបតែវិលត្រឡប់ទៅប្រទេសកូរ៉េខាងត្បូងវិញកាលពីពេលថ្មីៗនេះ បន្ទាប់ពីចប់ភារកិច្ចក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដោយទទួលបានមេដាយមាស១គ្រឿង និងសំរិទ្ធ១គ្រឿងជូនជាតិ។ កីឡាការិនីរូបនេះតែងតែធ្វើសកម្មភាពសប្បុរសធម៌ដើម្បីជួយដល់កុមារក្រីក្រ និងអ្នកខ្វះខាតនៅប្រទេសកម្ពុជា៕