កីឡា

ម៉ាឡេស៊ី ប្រកាសដណ្ដើមមេដាយមាស ៣៣គ្រឿង ពីអាស៊ានប៉ារ៉ាហ្គេម នៅកម្ពុជា

បានផុស

៤ ខែ មុន

នៅ

ថ្ងៃព្រហស្បតិ៍ ១ មិថុនា ២០២៣

ដោយ

ប្រតិភូកីឡាពិការម៉ាឡេស៊ី បានកំណត់គោលដៅដើម្បីសម្រេចការឈ្នះឱ្យបានមេដាយមាស ៣៣គ្រឿង ប្រាក់ ៥១គ្រឿង និងសំរឹទ្ធ ៥៨គ្រឿង ក្នុងព្រឹត្តិការណ៍អាស៊ានប៉ារ៉ាហ្គេម ឆ្នាំ២០២៣ នៅកម្ពុជា ចាប់ពីថ្ងៃទី០៣ ដល់ទី០៩ ខែមិថុនា។

ប្រធានក្រុមប្រឹក្សាប៉ារ៉ាឡាំពិកនៃប្រទេសម៉ាឡេស៊ី (PCM) លោក Shahriman Zaharudin បាននិយាយថា មេដាយមាសដែលត្រូវបានកំណត់គោលដៅគឺទាបជាងបើប្រៀបធៀបទៅនឹងសមិទ្ធិផលរបស់ពួកគេនៅទីក្រុង Solo ប្រទេសឥណ្ឌូនេស៊ីកាលពីឆ្នាំមុន ដែលពួកគេត្រលប់មកផ្ទះវិញជាមួយនឹងមេដាយ ៣៦-២០-១៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា នេះគឺដោយសារម្ចាស់មេដាយមាសឆ្នាំចាស់ចំនួន ៣នាក់របស់ម៉ាឡេស៊ីនឹងមិនចូលរួមប្រកួតលើកនេះនោះទេ គឺម្ចាស់មេដាយមាសប៉ារ៉ាឡាំពិក Mohd Latif Romly (លោតចម្ងាយ), Muhammad Ziyad Zolkefli (ចោលដុំដែក) និង Cheah Liek Hou (វាយសីប៉ារ៉ា)។

Megat D. Shahriman បាននិយាយថា អត្តពលិកសម្រាប់ការប្រកួតអាស៊ានប៉ារ៉ាហ្គេម លើកទី១២ នឹងមានអត្តពលិកចំនួន ១៤៤នាក់ ដែលក្នុងនោះមាន ៦២នាក់ ឬ ៤៣ភាគរយ ដែលបង្ហាញខ្លួនជាលើកដំបូងរបស់ពួកគេ។

លោក Megat D. Shahriman បានបន្តទៀតថា «យ៉ាងណាក៏ដោយ យើងមានទំនុកចិត្តថា ពួកគេអាចសម្រេចបានគោលដៅមេដាយមាស។ ក្នុងការកំណត់គោលដៅមេដាយលើកនេះ ក្រុមប្រឹក្សាកីឡាជាតិ (NSC) និង PCM បានអនុវត្តវគ្គភ្ជាប់គ្នាជាមួយសមាគមកីឡាជាតិដែលនឹងចូលរួមប្រកួតប្រជែងក្នុង APG លើកនេះ»។

លោកបានបន្តថា៖ «ការសម្រេចចិត្តរបស់ម្ចាស់ផ្ទះ (កម្ពុជា) ក៏មិនបានចុះបញ្ជីវិញ្ញាសាចំនួន១០ ដែលមកពីកីឡាចំនួន ២ គឺកីឡាបាញ់ធ្នូ និងវាយកូនបាល់លើរទេះ។ ប្រសិនបើគេរៀបចំ យើងអាចឈ្នះបានមាស៣ ប្រាក់២ និងសំរឹទ្ធ៣»។

លោកបានបន្តថា ក្នុងចំណោមព្រឹត្តិការណ៍សរុប ម៉ាឡេស៊ីនឹងចូលរួមប្រកួតក្នុងចំនួន ១៥៣វិញ្ញាសា ឬស្មើនឹង ៣៥,៦៦ភាគរយនៃវិញ្ញាសា ចំនួន៤២៩ ដែលបានចូលរួម៕

ប្រែសម្រួល ៖ មន្នីរ័ត្ន

ប្រភព ៖ bernama.com