កីឡា

សុខ រិទ្ធ កំពុងទទួលបានជោគជ័យទាំងផ្ទាល់ខ្លួននិងជូនជាតិ

បានផុស

២ years មុន

នៅ

ថ្ងៃអង្គារ ១២ ធ្នូ ២០២៣

ដោយ

កីឡាករប្រដាល់ទម្ងន់ស្រាល សុខ រិទ្ធ កំពុងទទួលបានជោគជ័យគួរឲ្យកត់សំគាល់ក្នុងអាជីពរបស់ខ្លួន បន្ទាប់ពីវិលត្រឡប់មកប្រទេសកម្ពុជាវិញកាលពីឆ្នាំ២០២២ ក្រោយបានចំណាយពេលច្រើនឆ្នាំនៅប្រទេសថៃជាមួយឪពុកម្តាយដែលធ្វើការនៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រកបអាជីពប្រដាល់នៅប្រទេសថៃ សុខ រិទ្ធ មិនសូវបានប្រកួតញឹកញាប់ទេ ហើយក៏មិនបានប្រកួតក្នុងកម្មវិធីសំខាន់ៗដែរ ស្របពេលវិបត្តិជំងឺកូវីដ-១៩ ផ្ទុះឡើង រឹតតែធ្វើឲ្យរូបគេមិនសូវមានឱកាសប្រកួតថែមទៀត។ ក្រោយកូវីដ-១៩បានស្ងប់ស្ងាត់ រូបគេបានត្រឡប់មកប្រទេសកម្ពុជាវិញដោយបានចូលហ្វឹកហាត់កីឡាឃីកបុកស៊ីង។ នៅពេលឆ្នាំ២០២២ រូបគេទទួលបានឱកាសប្រកួតគុនខ្មែរញឹកញាប់នៅកម្ពុជា និងបានតំណាងជម្រើសជាតិចេញទៅប្រកួតឃីកបុកស៊ីងជើងឯកអាស៊ី។

ប្រតិភូកីឡាឃីកបុកស៊ីងកម្ពុជាបានឈ្នះមេដាយមាស២ ប្រាក់៥ និងសំរិទ្ធ៥ ក្នុងនោះ សុខ រិទ្ធ បានឈ្នះមេដាយមាសក្នុងការប្រកួតឃីកបុកស៊ីងជ្រើសរើសជើងឯកអាស៊ីឆ្នាំ២០២២។ នៅឆ្នាំ២០២៣ រូបគេបានឈ្នះមេដាយមាសកីឡាឃីកបុកស៊ីង ក្នុងកីឡាស៊ីហ្គេម លើកទី៣២ ជូនជាតិថែមទៀត។ កាលពីខែវិច្ឆិកា រូបគេបានឈ្នះពានម៉ារ៉ាតុងដែលមានប្រាក់រង្វាន់៤លានរៀល។

ពាក់ព័ន្ធនឹងអាជីពប្រដាល់ សុខ រិទ្ធ បានប្រាប់«កម្ពុជាថ្មី»ថា៖«ខ្ញុំស្រឡាញ់ប្រដាល់តាំងពីក្មេង ព្រោះខ្ញុំរៀនអត់ពូកែ។ កាលនៅរៀន គ្រាន់តែចូលសាលា ខ្ញុំមានអារម្មណ៍ឈឺក្បាល។ ខ្ញុំស្រឡាញ់ប្រដាល់តាំងពីជំនាន់លោកគ្រូ អេ ភូថង, លោកគ្រូ វ៉ន វីវា មើលពួកគាត់វ៉ៃតាមទូរទស្សន៍សខ្មៅ»។

សុខ រិទ្ធិ បន្តថា អាចមកពីខ្លួនមិនចូលចិត្តរៀន និងគ្រួសារមានជីវភាពខ្វះខាតផង ក៏មកហាត់ប្រដាល់ទើបជំរុញឲ្យរូបគេចាប់យកអាជីពនេះ ទោះជាប្រឈមការឈឺខ្លួន។

ចុងឆ្នាំ២០២៣ សុខ រិទ្ធ ស្ទើរតែមិនជឿថា គុនខ្មែរទទួលបានគាំទ្រខ្លាំងពីមហាជន និងមានអ្នកជួយជ្រោមជ្រែងរៀបចំកម្មវិធីធំៗច្រើន។

សុខ រិទ្ធិ បានបន្ថែមថា ៖«តាំងពីខ្ញុំចាប់អាជីពជាអ្នកប្រដាល់មកខ្ញុំមិនដែលគិតថា គុនខ្មែរទទួលបានការគ្រាំទ្រយ៉ាងខ្លាំងបែបនេះទេ។ ខ្ញុំទើបតែឃើញ២ឆ្នាំចុងក្រោយនេះទេ មានបងប្អូនគាំទ្រគុនខ្មែរច្រើន។ ខ្ញុំគិតថា រយៈពេល២ទៅឆៅ៣ឆ្នាំទៀត គុនខ្មែរកាន់តែរីកចម្រើនជាងនេះទៀត បើបងប្អូននៅតែបន្តការគាំទ្របែបនេះរហូត»៕