កីឡា

កីឡាករជប៉ុនសុទ្ធតែខ្លាំងឈ្នះទាំងអស់ជុំទី១ខ្សែក្រវាត់ K-1 ទម្ងន់៥៥គីឡូក្រាម

បានផុស

១១ ខែ មុន

នៅ

ថ្ងៃចន្ទ ៨ កក្កដា ២០២៤

ដោយ

កីឡាករឃីកបុកស៊ីងជប៉ុនទទួលបានជ័យជម្នះទាំង៤រូបសម្រាប់ការប្រកួតជុំទី១ ខ្សែក្រវាត់ឃីកបុកស៊ីងពិភពលោក K-1 ទម្ងន់៥៥គីឡូក្រាម កាលពីថ្ងៃអាទិត្យ ទី៧ ខែកក្កដា ឆ្នាំ២០២៤។

កីឡាករ Rui Okubo បានឈ្នះពិន្ទុកីឡាករចិន។ កីឡាករ Riamu Sera បានផ្តួលកីឡាករក្រិកក្នុងទឹកទី៤។ កីឡាករ Masahi Kumura បានផ្តួលកីឡាករអេស្ប៉ាញក្នុងទឹកទី១ និងកីឡាករ Akihiro Kaneko បានផ្តួលកីឡាករកម្ពុជា កាន់ ម៉េងហុង ក្នុងទឹកទី៣។ ដូច្នេះនៅវគ្គពាក់កណ្តាលផ្តាច់ព្រ័ត្រសុទ្ធតែកីឡាករជប៉ុនទាំង៤រូប។

កីឡាករ Rui Okubo

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករវ័យក្មេង Rui Okubo បានយកឈ្នះពិន្ទុកីឡាករចិន Zhao Zhendong បន្ទាប់ពីតស៊ូគ្នា៣ទឹកដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។ រូបគេអាយុទើប១៩ឆ្នាំ និងមានប្រវត្តិឡើងសង្វៀន៨ដងប៉ុណ្ណោះគឺឈ្នះ៧ និងចាញ់១។ រូបគេជាម្ចាស់ខ្សែក្រវាត់ Krush Flyweight ទម្ងន់៥១គីឡូក្រាមកាលពីឆ្នាំ២០២២។

កីឡាករ Riamu Sera

កីឡាករ Riamu បានផ្តួលកីឡាករក្រិក Angelos Martinos ឲ្យអាជ្ញាកណ្តាលបញ្ឈប់ក្នុងទឹកទី៤ បន្ទាប់ពីប្រើពេល៣ទឹកស្មើគ្នា ហើយថែមមួយទឹកទៀត។ រូបគេអាយុ២៣ឆ្នាំទើបចាប់ផ្តើមអាជីពកាលពីឆ្នាំ២០១៨ដោយឆ្លងកាត់លើសង្វៀន១៧ដង ក្នុងនោះឈ្នះ១៤ដង ចាញ់៣ដង និងធ្លាប់ផ្តួលដៃគូឲ្យសន្លប់៦ដង។ រូបគេជាម្ចាស់ខ្សែក្រវាត់ Krush Super Bantamweight ឆ្នាំ២០២១ និងជាលើកទី១ដែលរូបគេប្រកួតជាមួយដៃគូបរទេស។

កីឡាករ Masahi Kumura

កីឡាករជប៉ុន Masahi Kumura បានផ្តួលកីឡាករអេស្ប៉ាញ Antonio Orden ឲ្យសន្លប់ក្នុងទឹកទី១តាមរយៈកណ្តាប់ដៃឆ្វេងដ៏ធ្ងន់។ រូបគេអាយុ២៥ឆ្នាំបានចាប់ផ្តើមអាជីពតាំងពីឆ្នាំ២០១៤ដោយធ្លាប់ប្រកួត៣០ដង ឈ្នះ២៤ដង និងចាញ់៦ដង ក្នុងនោះធ្លាប់ផ្តួលដៃគូឲ្យសន្លប់១២ដង។ រូបគេធ្លាប់បានចំណាត់ថ្នាក់លេខ២ពីរដងសម្រាប់ការប្រកួតខ្សែក្រវាត់ពិភពលោក K-1 World GP គឺឆ្នាំ២០១៩ និង២០២២ និងជាម្ចាស់ខ្សែក្រវាត់ Krush Super Bantamweight ឆ្នាំ២០១៩។

កីឡាករ Akihiro Kaneko

កីឡាករ Akihiro Kaneko បានផ្តួលកីឡាករកម្ពុជា កាន់ ម៉េងហុង ឲ្យសន្លប់ធំក្នុងទឹកទី៣ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។ រូបគេមានអាយុ២៧ឆ្នាំបានចាប់ផ្តើមប្រឡូកប្រដាល់ឃីកបុកស៊ីងតាំងពីឆ្នាំ២០១៤។ រហូតដល់ពេលនេះ រូបគេធ្លាប់ប្រកួតបាន២៤ដង ក្នុងនោះឈ្នះ២២ដង និងចាញ់២ដង ហើយធ្លាប់ផ្តួលដៃគូឲ្យសន្លប់១២ដង។ រូបគេជាម្ចាស់ខ្សែក្រវាត់ឃីកបុកស៊ីង៣ខ្សែគឺខ្សែក្រវាត់ Krush Bantamweight ឆ្នាំ២០១៨, ខ្សែក្រវាត់ K-1 Super Bantamweight ឆ្នាំ២០២២ និងខ្សែក្រវាត់ K-1 World GP Super Bantamweight ឆ្នាំ២០២២។

ក្នុងចំណោមកីឡាករជប៉ុនទាំង៤រូបខាងលើ Kaneko មានពិសោធច្រើនជាងគេ ហើយជាកីឡាករលំដាប់លេខ១សម្រាប់ប្រភេទទម្ងន់៥៥គីឡូក្រាម ក្នុងប្រទេសជប៉ុន។ រូបគេមានបច្ចេកទេសល្អ អាវុធច្បាស់ៗ និងមានទម្ងន់។ ជាក់ស្តែងរូបគេទាត់ កាន់ ម៉េងហុង ឲ្យឈឺជើងក្នុងទឹកទី១ ខណៈទឹកទី២ និងទី៣ ចេញកណ្តាប់ដៃមួយៗសុទ្ធតែធ្វើឲ្យកីឡាករកម្ពុជាដួលតែម្តង។