កីឡា

ឯកឧត្ដម ហ៊ុន ម៉ានី វាយតម្លៃខ្ពស់ចំពោះគណៈកម្មការ រៀបចំការប្រកួតបាល់ទាត់បានជោគជ័យ និងរលូន

បានផុស

២ years មុន

នៅ

ថ្ងៃពុធ ១០ កក្កដា ២០២៤

ដោយ

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានកោតសរសើរ និងវាយតម្លៃខ្ពស់ចំពោះគណៈកម្មការរៀបចំការប្រកួត ដែលរៀបចំការប្រកួតកីឡាបាល់ទាត់បានជោគជ័យ និងរលូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកោតសរសើរ និងវាយតម្លៃ នេះ ក្នុងឱកាស ឯកឧត្ដម ហ៊ុន ម៉ានី បានអញ្ជើញជាអធិបតីក្នុងកម្មវិធីបិទការប្រកួតបាល់ទាត់ពានរង្វាន់ SOCCER LEAGUE លើកទី ៧ ឆ្នាំ ២០២៤ នៅពហុកីឡដ្ឋានជាតិអូឡាំពិក កាលពីរសៀលថ្ងៃទី ០៩ ខែកក្កដា ឆ្នាំ ២០២៤ ម្សិលមិញ។

នាឱកាសនោះ ឯកឧត្ដម ហ៊ុន ម៉ានី បានកោតសរសើរ និងវាយតម្លៃខ្ពស់ចំពោះគណៈកម្មការរៀបចំការប្រកួត ដែលរៀបចំការប្រកួតកីឡាបាល់ទាត់បានជោគជ័យ និងរលូន ជាពិសេសនោះគឺបានបង្កើតនូវស្មារតីយោគយល់ និងអធ្យាស្រ័យគ្នា រវាងកីឡាករ កីឡាការិនី មកពីអង្គភាព-ស្ថាប័នខុសៗ គ្នា។

ទន្ទឹមនេះ ឯកឧត្ដម ហ៊ុន ម៉ានី ក៏បានថ្លែងអំណរគុណចំពោះ ក្រសួងអប់រំ យុវជន និងកីឡា ក្រុមហ៊ុនឯកជន ដែលចូលរួមគាំទ្រ និងសហការ ក្នុងការប្រកួតនេះ ជាពិសេសសប្បុរសជនចូលរួមបរិច្ចាគក្នុងការប្រកួតបាល់ទាត់សប្បុរសធម៌ ក្រោមមូលបទ «បេះដូងអ្នកកីឡា ដើម្បីកុមារកម្ពុជា»។

គួរជម្រាបថា អញ្ជើញមានវត្តមាននាឱកាសនោះរួមមាន ឯកឧត្ដមអភិសន្តិបណ្ឌិត ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការ SOCCER LEAGUE ឯកឧត្ដម លោកជំទាវ ថ្នាក់ដឹកនាំ ស.ស.យ.ក ឯកឧត្ដម លោកជំទាវ តំណាងក្រសួង-ស្ថាប័ន ក្រុមហ៊ុនឯកជន ភ្ញៀវកិត្តិយស ទស្សនិកជនជាច្រើនកុះករផងដែរ។

សូមបញ្ជាក់ដែរថា បន្ទាប់ពីបានឆ្លងកាត់ការប្រកួតយ៉ាងស្វិតស្វាញរយៈពេល ៣ ខែ មកនេះ ព្រឹត្តិការណ៍ប្រកួតកីឡាបាល់ទាត់ ពានរង្វាន់ Soccer League លើកទី ៧ ក្រោមមូលបទ «បេះដូងអ្នកកីឡា ដើម្បីកុមារកម្ពុជា» បានរកឃើញម្ចាស់ជើងឯក ក្រុមបាល់ទាត់បុរស ដោយបានទៅលើក្រុម KHMER UNITED ក្រោយយកឈ្នះក្រុម TOFU ARMY FT ក្នុងលទ្ធផល ២-១៕