កីឡា

៦នាក់ឈ្នះល្ងាចមិញ ថ្ងៃនេះអត្តពលិកកម្ពុជាច្រើននាក់ទៀតប្រកួតឃីកបុកស៊ីងអាស៊ី

បានផុស

២ years មុន

នៅ

ថ្ងៃពុធ ៩ តុលា ២០២៤

ដោយ

កីឡាករ កីឡាការិនីកម្ពុជា៦នាក់ទទួលបានជ័យជម្នះសម្រាប់ការប្រកួតថ្ងៃទី១ កាលពីថ្ងៃទី៨ ខែតុលា ឆ្នាំ២០២៤ សម្រាប់ព្រឹត្តិការណ៍ប្រកួតកីឡាឃីកបុកស៊ីង ជើងឯកអាស៊ី ឆ្នាំ២០២៤ នៅរាជធានីភ្នំពេញ។

ភាគច្រើនអត្តពលិកកម្ពុជាដែលទទួលបានជ័យជម្នះកាលពីថ្ងៃទី១សុទ្ធជាអ្នកមានបទពិសោធក្នុងការប្រកួតឃីកបុកស៊ីងទាំងកម្រិតអាស៊ី និងស៊ីហ្គេម។ ជាក់ស្តែង សុខ រិទ្ធ ម្ចាស់មេដាយមាសស៊ីហ្គេម ឆ្នាំ២០២៣ និងមេដាយមាសឃីកបុកស៊ីងអាស៊ី ឆ្នាំ២០២២ បានយកឈ្នះកីឡាករវៀតណាម Nguyen Dinh Minh Khue ដោយពិន្ទុលើ វិញ្ញាសា-៥១គីឡូក្រាមដើម្បីឡើងវគ្គបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ ខាំ ខ្លានាង ម្ចាស់មេដាយមាសស៊ីហ្គេម ឆ្នាំ២០២៣ បានយកឈ្នះកីឡាករហ្វីលីពីន Pareja Janse ដោយពិន្ទុលើវិញ្ញាសា-៥១គីឡូក្រាមដើម្បីឡើងវគ្គបន្ត ហើយកីឡាករទម្ងន់ស្រាល ហ៊ឹម គឹមរៀង បានយកឈ្នះកីឡាករហ្វីលីពីន Camingawan Mikko លើវិញ្ញាសា-៥៤គីឡូក្រាមដើម្បីឡើងទៅវគ្គមេដាយដែរ។

អ្វីដែលគួរឲ្យភ្ញាក់ផ្អើលនោះគឺកីឡាករចាស់វស្សា វៀត ប៊ុនឌឿន បានឡើងទៅវគ្គបន្ត បន្ទាប់ពីបានយកឈ្នះកីឡាករម៉ាឡេស៊ី Mohd Azir Bin Nazman ដោយពិន្ទុលើ វិញ្ញាសា-៦០គីឡូក្រាម។ កីឡាករ វ៉ុន គឹមចេង ឈ្នះកីឡាករឥណ្ឌូណេស៊ី Tendean Exsel Martin Pondaang។

ចំពោះកីឡាការិនី ធន់ ស្រីពេញ បានធ្វើឲ្យអ្នកគាំទ្ររបស់ខ្លួនបុកពោះមិនស្ទើរទេ នៅពេលកីឡាការិនីថៃ Aemsakun Kamponthip នាំមុខដោយពិន្ទុ ៣-០ ប៉ុន្តែក្នុងវិនាទីចុងក្រោយកីឡាការិនីកម្ពុជាបានទាត់យកពិន្ទុឈ្នះដោយលទ្ធផល ២-១ ដើម្បីឡើងទៅកាន់វគ្គបន្តសម្រាប់វិញ្ញាសា -៥០គីឡូក្រាម។

ទោះបីជាយ៉ាងណា មានការសោកស្តាយចំពោះកីឡាករ កីឡាការិនីកម្ពុជាជាច្រើនរូបបានចាញ់នៅក្នុងវគ្គជម្រុះជុំទី១។

កីឡាករ ហេន ហ៊ន ចាញ់កីឡាករវៀតណាម Nguyen Minh Hieu
កីឡាករ ម៉ូយ ព្រីន ចាញ់កីឡាករឥណ្ឌា Makorwal Aditya
កីឡាករ គង់ លីហ៊ូវ ចាញ់កីឡាករវៀតណាម Nguyen Dinh Thai
កីឡាករ តែម រ៉ូមលី ចាញ់កីឡាករវៀតណាម Nguyen Van Ha
កីឡាករ សែម កក្កដា ចាញ់កីឡាករអ៊ូបេគីស្ថាន Hayotov Makmud
កីឡាករ ឆេង លៀង ចាញ់កីឡាករហ្វីលីពីន Banario Honorio ដោយអាជ្ញាកណ្តាលបញ្ឈប់ក្នុងទឹកទី២

នៅថ្ងៃទី២ ដែលត្រូវនឹងថ្ងៃទី៩ ខែតុលា ឆ្នាំ២០២៤ មានកីឡាករ កីឡាការិនីកម្ពុជាជាច្រើនរូបបន្តប្រកួតទៀតក្នុងនាមម្ចាស់ផ្ទះ៕

អត្ថបទ៖ វីរបុត្រ

Related Topics:កីឡាប្រដាល់ឃីកបុកស៊ីង