ការប្រកួត WKN គុនខ្មែរជើងឯកពិភពលោក គ្រោងធ្វើលើកដំបូងនៅខែតុលា

ស្ថាប័នសម្ព័ន្ធឃីគបុកស៊ីងពិភពលោក (World Kickboxing Network) បានប្រកាសអំពីគម្រោងរៀបចំការប្រកួតដណ្តើមខ្សែក្រវាត់ WKN គុនខ្មែរជើងឯកពិភពលោក (WKN Kun Khmer World Championship) ជាលើកដំបូង។

កាលពីពេលថ្មីៗនេះស្ថាប័ន WKN បានប្រកាសនៅលើទំព័រ Facebook របស់ខ្លួនថា៖ «គុនខ្មែរ! ព្រឹត្តិការណ៍ជាប្រវត្តិសាស្ត្រនឹងធ្វើឡើងនៅខែ តុលា ឆ្នាំ ២០២៥។ បច្ចុប្បន្នប្រធានរបស់ស្ថាប័ន WKN កំពុងពិភាក្សាជាមួយសហព័ន្ធប្រដាល់គុនខ្មែរនៅទីក្រុងភ្នំពេញ ដើម្បីរៀបចំការប្រកួតដណ្តើមខ្សែក្រវាត់ WKN Kun Khmer World Championship ជាលើកដំបូង»។

នៅក្នុងសេចក្តីប្រកាសនោះបានបន្តទៀតថា៖ «ពួកយើងកំពុងស្ថិតក្នុងការចរចាអំពីគន្លឹះសំខាន់ៗ ដើម្បីឈានទៅរកការរៀបព្រឹត្តិការណ៍ជាប្រវត្តិសាស្ត្រនេះជាផ្លូវការ ដែលជាការប្រកួតដណ្តើមខ្សែក្រវាត់ WKN Kun Khmer World Championship លើកដំបូង នៅក្នុងប្រទេស ដែលជាដើមកំណើតនៃគុនប្រយុទ្ធមួយនេះ…»។

ជាការពិត ចាប់តាំងពីស្ថាប័ន WKN បានចាប់ដៃជាមួយគុនខ្មែរ គឺពុំទាន់បានរៀបចំការប្រកួតណាមួយនៅឡើយទេ។ ខណៈនៅក្នុងការប្រកាសរបស់ WKN គឺពួកគេគ្រោងនឹងរៀបចំការប្រកួតដណ្តើមខ្សែក្រវាត់ WKN គុនខ្មែរជើងឯកពិភពលោក ជាលើកដំបូងនៅក្នុងប្រទេស កម្ពុជា នាដើមខែ​ តុលា ឆ្នាំ ២០២៥។

ទោះបីយ៉ាងណា WKN បានបញ្ជាក់ថា ឥឡូវនេះ ពួកគេកំពុងស្ថិតក្នុងការចរចាជាមួយសហព័ន្ធគុនខ្មែរនៅឡើយ។ ដូច្នេះការប្រព្រឹត្តិទៅផ្លូវការយ៉ាងណា នឹងដឹងលម្អិតនាពេលបន្ទាប់៕

អត្ថបទ៖ សេម កុសល