កីឡា

ព្រះខ័នរាជស្វាយរៀង ឈរលើកំពូលតារាងបណ្តោះអាសន្ន ក្រោយឈ្នះ Shan United ៣-០

បានផុស

៩ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

ក្លិបបាល់ទាត់ ព្រះខ័នរាជស្វាយរៀង ទទួលបានជ័យជម្នះលើក្រុមម្ចាស់ផ្ទះ Shan United ដោយលទ្ធផល ៣-០ សម្រាប់ការប្រកួតលើកដំបូងពានរង្វាន់ក្លិបកំពូលអាស៊ាន ASEAN Club Championship នៅយប់ថ្ងៃទី២១ ខែសីហា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតបានត្រឹមតែ ១១នាទីប៉ុណ្ណោះ មិន រតនៈ ស៊ុតចូលគ្រាប់បាល់នាំមុខ ១-០ បន្ទាប់ពីខ្សែប្រយុទ្ធ Patrick បញ្ជូនបាល់ឲ្យយ៉ាងល្អ។ ការប្រកួតកន្លងទៅបាន ៨ នាទីទៀត ខ្សែការពារសញ្ជាតិជប៉ុន Ryuji Hirota របស់ម្ចាស់ផ្ទះ ត្រូវបានអាជ្ញាកណ្តាលពិន័យកាតក្រហមដោយបណ្តេញចេញពីទីលាន ដូច្នេះ Shan United មានគ្នាតែ ១០នាក់ លេងទល់នឹង ព្រះខ័នរាជស្វាយរៀង ១១នាក់។

ទោះបីជាម្ចាស់ផ្ទះមានសមាជិកត្រឹមតែ ១០នាក់ ក៏ព្រះខ័នរាជស្វាយរៀង លេងតាមដំណើរដោយមិនព្យាយាមសម្រុកខ្លាំងទេ។ គ្រាប់ទី២បានកើតមានឡើងនៅចុងវគ្គទី២ ដោយខ្សែប្រយុទ្ធប្រេស៊ីល Patrick តែតចូលទី បន្ទាប់ពីខ្សែបម្រើ យូឌៃ អូកាវ៉ា លើកបាល់ជ្រុងនៅនាទី ៤៥+៥។

ការប្រកួតនៅវគ្គទី ២ ព្រះខ័នរាជស្វាយរៀង រកបានតែ ១គ្រាប់ទៀតប៉ុណ្ណោះតាមរយៈការទាត់ពិន័យ ១១ ម៉ែត្ររបស់ខ្សែប្រយុទ្ធសញ្ញាតិហ្គាណា Kwame Peprah នៅនាទី ៥៣។ ក្រុមម្ចាស់ផ្ទះ Shan United ក៏បានព្យាយាម និងបង្កើតឱកាសខ្លះដែរ ប៉ុន្តែមិនអាចទម្លាយសំណាញ់ទីរបស់ព្រះខ័នរាជស្វាយរៀងឡើយ។

តាមរយៈជ័យជម្នះនេះ ព្រះខ័នរាជស្វាយរៀង ឡើងឈរលើកំពូលតារាងពូល B ដោយមាន ៣ ពិន្ទុ និងចំណេញគ្រាប់បាល់ ៣ គ្រាប់ ខណៈលេខ២ឈរដោយក្រុមខ្លាំងម៉ាឡេស៊ី Johor Darul Dazim ដែលមាន ៣ ពិន្ទុដែរ បន្ទាប់ពីឈ្នះក្រុមរបស់សិង្ហបុរី Lion City Sailors ដោយលទ្ធផល ៣-១។

យ៉ាងណា ក្រុម២មិនទាន់បានប្រកួតគឺ Bangkok United របស់ថៃ និងក្រុម Nam Định របស់ វៀតណាម ដែលត្រូវប្រកួតនៅថ្ងៃទី ២៥ ខែកញ្ញា ឆ្នាំ ២០២៥៕