កីឡា

កីឡាករ កីឡាការិនីកម្ពុជា ចំនួន ៣៧នាក់នឹងត្រូវប្រឡងបាក់ឌុប ២០២៥ ស្អែកនេះ

បានផុស

១១ ខែ មុន

នៅ

ថ្ងៃពុធ ២៧ សីហា ២០២៥

ដោយ

Sina Noun

ក្រុមកីឡាករ កីឡាការិនីជម្រើសជាតិកម្ពុជា ចំនួន ៣៧នាក់នឹងត្រូវចូលរួមប្រឡងបាក់ឌុបរយៈពេល ២ថ្ងៃចាប់ពីថ្ងៃស្អែកនេះហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យានគី ស៊ីវត្ថា

បើតាមលោក យានគី ស៊ីវត្ថា ប្រធានមជ្ឈមណ្ឌលជាតិហ្វឹកហ្វឺនកីឡា បានឲ្យដឹងថា សម្រាប់ក្រុមជម្រើសជាតិកម្ពុជាដែលនឹងត្រូវចូលរួមប្រឡងបាក់ឌុបនៅឆ្នាំនេះមានចំនួនសរុប ៣៧នាក់នៃ ២០ប្រភេទកីឡាផ្សេងគ្នា។ ក្នុងចំណោមអ្នកទាំង ៣៧នាក់នោះគឺមានបុរស ២៥នាក់ និងនារី ១២នាក់។

កីឡាករ គោរមៈ ច័ន្ទរាជ្យ

ចំណែកជើងខ្លាំងគុនខ្មែរ គោរមៈ ច័ន្ទរាជ្យ បានប្រាប់ឲ្យដឹងថារូបគេក៏នឹងត្រូវប្រឡងបាក់ឌុបស្អែកនេះដែរ។ បើតាមឈ្មោះអក្សររូបគេនឹងត្រូវប្រឡងនៅអនុវិទ្យាល័យចតុមុខ ប៉ុន្តែមិនទាន់បានទៅមើលលេខបន្ទប់ និងលេខតុនៅឡើយទេ។

ចំណែកកីឡាករបាល់ទាត់ជម្រើសជាតិកម្ពុជា បុង សាំយូអែល ដែលកំពុងមានឈ្មោះក្នុងក្រុមជម្រើសជាតិកម្ពុជា អាយុ២៣ឆ្នាំក៏មានឈ្មោះប្រឡងដែរ ប៉ុន្តែរូបគេមិនបានដកខ្លួនចេញពីជម្រើសជាតិដែលត្រូវប្រកួតពានអាស៊ី AFC U23 Asian Cup នៅថ្ងៃទី៣ ខែកញ្ញា ទេ ខណៈអ្នកចាំទី រ៉ុន ចុងមីង បានសម្រេចដកខ្លួនដើម្បីយកពេលត្រៀមប្រឡង។

បញ្ជាក់ដែរថា សម័យប្រឡងបាក់ឌុប ឆ្នាំ២០២៥ នេះនឹងធ្វើឡើងវិញចាប់ពីថ្ងៃទី២៨ ដល់ ២៩ ខែសីហា បន្ទាប់ពីបានពន្យារពេលដោយសារបញ្ហាព្រំដែនកាលពីពេលថ្មីៗនេះ។ ស្អែកនេះឈានដល់ថ្ងៃប្រឡងថ្ងៃទី១ ហើយសម្រាប់បេក្ខភាពទាំងអស់មិនថានៅរាជធានីភ្នំពេញ ឬតាមបណ្ដាខេត្តនោះឡើយ។ ការប្រឡងបាក់ឌុប ២០២៥ មានបេក្ខជនសរុបជាង ១៤ម៉ឺននាក់៕