Messi និង​ Ronaldo ត្រៀមបំបែកកំណត់ត្រាជាប្រវត្តិសាស្ត្រមួយ នៅ 2026 World Cup

ខ្សែប្រយុទ្ធក្រុមជម្រើសជាតិ អាហ្សង់ទីន Lionel Messi និងខ្សែប្រយុទ្ធក្រុមបញ្ចខែល ព័រទុយហ្គាល់ Cristiano Ronaldo កំពុងស្ថិតនៅលើផ្លូវ ត្រៀមបំបែកកំណត់ត្រា ក្លាយជាកីឡាករបង្ហាញខ្លួនច្រើនជាងគេបំផុតនៅព្រឹត្តិការណ៍បាល់ទាត់ជើងឯកពិភពលោក ប្រសិនបើអ្នកទាំង ២ បានលេងនៅ World Cup ឆ្នាំ ២០២៦។

ការប្រកួតព្រឹត្តិការណ៍បាល់ទាត់ជើងឯកពិភពលោក ឆ្នាំ ២០២៦ ត្រូវបានគេដឹងថា អាចនឹងក្លាយជាការប្រកួតចុងក្រោយ​សម្រាប់ Messi និង Ronaldo ពីព្រោះ​អ្នកទាំង ២ ​អាយុ​កាន់​តែ​ច្រើន ដោយម្ចាស់​អាវ​លេខ ១០ អាយុ ៣៨ ឆ្នាំ និងម្ចាស់​អាវ​លេខ ៧ មាន​អាយុ ៤០ ឆ្នាំ។

ទោះ​បី​ជា​យ៉ាងណា ប្រសិនបើកំពូលកីឡាករ​ទាំង ២ បានបង្ហាញខ្លួននៅ World Cup ឆ្នាំ ២០២៦ មួយលើកទៀត នោះពួកគេនឹងក្លាយជាកីឡាករដំបូងគេបង្អស់ក្នុងប្រវត្តិសាស្ត្របាល់ទាត់ ដែលបង្ហាញខ្លួនបានចំនួន ៦ លើកនៅព្រឹត្តិការណ៍បាល់ទាត់​ដែល​រៀប​ចំ​រាល់ ៤ ឆ្នាំ​ម្តង។

បច្ចុប្បន្ន Messi និង Ronaldo បានបង្ហាញខ្លួននៅព្រឹត្តិការណ៍ World Cup បានចំនួន ៥ លើកដូចគ្នា ហើយអ្នកទាំង ២ បានចាប់ផ្តើមមានឈ្មោះលេងដំបូង នៅ World Cup ឆ្នាំ ២០០៦ ក្នុងប្រទេស អាល្លឺម៉ង់ ដូចគ្នា។ លុះចាប់ពីពេលនោះមក គឺអ្នកទាំង ២ មិនដែលបានអវត្តមានពីការប្រកួតក្នុងព្រឹត្តិការណ៍ដ៏ធំ​មួយ​នេះ​ឡើយ។

គួរឱ្យដឹងថា នៅក្នុងប្រវត្តិសាស្ត្រព្រឹត្តិការណ៍បាល់ទាត់ជើងឯកពិភពលោក មិនទាន់មានកីឡាករណាម្នាក់ បានបង្ហាញខ្លួនដល់ ៦ លើកឡើយ ប៉ុន្តែសម្រាប់កីឡាករផ្សេងទៀត ក្រៅអំពី Messi និង Ronaldo គឺមានវីរបុរសបាល់ទាត់ ៥ រូប ធ្លាប់បានបង្ហាញខ្លួនបានចំនួន ៥ លើកផងដែរ ដូចជាលោក Antonio Carbajal, Lothar Matthäus, Rafael Márquez, Andrés Guardado និងលោក Guillermo Ochoa៕

អត្ថបទ៖ សេម កុសល