លោក McConkey ថា ទីលាន​​​ឡាយហ្វ ព្រះសីហនុ និង ស្តាតចាស់ ប៉ះ​ពាល់​ដល់​ទម្រង់​លេង

គ្រូបង្វឹករបស់ក្លិបព្រះខ័នរាជស្វាយរៀង លោក Matthew McConkey បានរិះគន់ទីលាន ឡាយហ្វ​ ខេត្ត​ព្រះ​សីហនុ និងស្តាតចាស់ របស់ក្លិប កងយោធពលខេមរភូមិន្ទ ពិតជាមានការពិបាកលេង ហើយស្ថានភាពទីលាន បានធ្វើឱ្យប៉ះពាល់ដល់​ទម្រង់​លេង។

ថ្លែងនៅក្នុងសន្និសីទសារព័ត៌មាន មុនការប្រកួតរវាង ព្រះខ័នរាជស្វាយរៀង និង ឡាយហ្វ​ ព្រះសីហនុ ក្នុងសប្តាហ៍ទី ៥ នៃក្របខណ្ឌលីគកំពូល កម្ពុជា នាថ្ងៃ សុក្រ ទី ១៩ ខែ កញ្ញា ឆ្នាំ ២០២៥ លោក McConkey បានមានប្រសាសន៍ ថា៖ «ប្រសិនបើការប្រកួតរបស់យើង ទល់នឹង ឡាយហ្វ ព្រះសីហនុ នៅទឹកដី ឡាយហ្វ ដែលស្ថានភាពទីលានរបៀបហ្នឹង។ យើងចង់ដឹង ថា ហេតុអ្វីបានជាសម្រេចចិត្តអនុញ្ញាតឱ្យប្រកួត? ដូចលោក Oleg (គ្រូបង្វឹកភ្នំពេញក្រោន) បាននិយាយអ៉ីចឹង ការហ្វឹកហាត់មុនមួយថ្ងៃ យើងឃើញទីលាន គឺពិបាក​លេង។ ទីលានរបៀបនេះ យើងយល់ស្របតាមសម្តី លោក Oleg គឺពិបាកក្នុងការលេង។ យើងឃើញហើយ ដូចជាការលេងបាល់ទះអ៉ីចឹង គឺទាត់ទៅទាត់មក កីឡាករអត់បានប្រើបច្ចេកទេសឡើយ»។

គ្រូបង្វឹកសញ្ជាតិ អៀរឡង់ វ័យ ៣២ ឆ្នាំបានបន្ត ដោយលើកអំពីទីលានស្តាតចាស់របស់ក្លិប កងយោធពលខេមរភូមិន្ទ ថា៖ «ទីលានមួយទៀត គឺ ស្តាតចាស់ ដែលជាទីលានរបស់ក្រុម ទ័ព យើងឃើញនៅមុខទីមានជង្ហុក។ ដូច្នេះវាពិបាកក្នុងការលេង ហើយឃើញហើយមានក្រុមមួយចំនួនបានបាត់បង់ពិន្ទុនៅទីនោះ»។

ខាងលើនេះ គឺជាការលើកឡើងរបស់លោក McConkey បន្ទាប់ពីមានការសួរនាំដោយអ្នកសារព័ត៌មាន អំពីទីលានរបស់ក្លិប ឡាយហ្វ ព្រះសីហនុ ដែលកំពុងមានការខូចខាតខ្លាំង ដោយសារបញ្ហាភ្លៀងស្ទើរាល់ថ្ងៃ។ ជាក់ស្តែង កាលពីសប្តាហ៍មុន ក្នុងការប្រកួតក្រុម ភ្នំពេញក្រោន យកឈ្នះ ឡាយហ្វ ព្រះសីហនុ ៣-២ គឺការលេងនៅទីលាន ឡាយហ្វ​ ពិតជាមានការពិបាកខ្លាំង។ ក្រុមទាំងសងខាង មិនអាចបង្ហាញបច្ចេកទេសលេងឱ្យបានល្អប្រសើរឡើយ ដោយសារតែទីលាននោះ បានដក់ទឹក ខ្ទេចខ្ទាំ ហើយទីលានវាលស្មៅពណ៌បៃតង បានក្លាយជាភក់ទៅហើយ។

ជាមួយគ្នានេះ គ្រូបង្វឹកក្រុមព្រះខ័នរាជស្វាយរៀង ក៏បានផ្សាភ្ជាប់អំពីទីលានស្តាតចាស់ របស់ក្លិប កងយោធពលខេមរភូមិន្ទ ផងដែរ។ លោកយល់ឃើញ ថា នៅលើទីលានត្រង់មុខទី គឺមានជង្ហុក ដែលជាហេតុធ្វើឱ្យក្រុមមួយចំនួនត្រូវបាត់បង់ពិន្ទុនៅទីនោះ។

ទោះបីជាយ៉ាងណា នេះគ្រាន់តែការយល់របស់លោក McConkey ដែលផ្អែក​លើ​​ភាព​ជាក់ស្តែងកន្លង​ប៉ុណ្ណោះ ខណៈនៅរដូវកាលថ្មី ២០២៥-២០២៦ ក្រុមព្រះខ័នរាជស្វាយរៀង មិនទាន់បានលេងនៅលើទីលានទាំង ២ ខាងលើនៅឡើយទេ៕

អត្ថបទ៖ សេម កុស