TikTok ឲ្យអ្នកប្រើប្រាស់អាយុក្រោម ១៨ ឆ្នាំ លេងត្រឹម ៦០ នាទីប៉ុណ្ណោះ

កម្មវិធីវីដេអូខ្លី TikTok នឹងកំណត់ពេលលើអេក្រង់ដោយស្វ័យប្រវត្តិត្រឹមតែរយៈពេល ៦០ នាទីប៉ុណ្ណោះសម្រាប់អ្នកប្រើប្រាស់ជាក្មេងជំទង់មានអាយុក្រោម ១៨ ឆ្នាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន ByteDance និយាយថា នៅពេលដែលនាទីកំណត់មកដល់ អ្នកប្រើប្រាស់ TikTok អាយុក្រោម ១៨ ឆ្នាំទាំងអស់ ដាច់ខាតត្រូវតែបញ្ចូលលេខកូដសម្ងាត់ដើម្បីអាចបន្តមើលវីដេអូបាន ។ ប៉ុន្តែបើសិនជាពួកគេចំណាយពេលមើលលើសពី ១០០ នាទី​ក្នុងមួយថ្ងៃ នោះ TikTok នឹងលោតសារដាស់តឿនមិនខាន ។

ជាមួយគ្នានោះ TikTok ក៏បានប្រកាសពីការអាប់ដេតចំពោះមុខងារ Family Pairing ដែលនឹងអនុញ្ញាតឲ្យមាតាបិតា ឬអាណាព្យាបាលអាចភ្ជាប់គណនីរបស់ពួកគេទៅ TikTok របស់កូនៗ និងកំណត់ការគ្រប់គ្រងដោយឪពុកម្តាយ ។

ការកំណត់របស់ក្រុមហ៊ុន TikTok នេះ គឺដើម្បីទប់ស្កាត់អ្នកប្រើប្រាស់ដែលមានអាយុក្រោម ១៨ ឆ្នាំមិនឲ្យលេងហួសកម្រិត ។​ តាមរយៈការសិក្សាពីមជ្ឈមណ្ឌលស្រាវជ្រាវ Pew កាលពីខែសីហាឆ្នាំមុនរកឃើញថា ៦៧ ភាគរយនៃក្មេងជំទង់អាមេរិកបានប្រើប្រាស់ TikTok ហើយក្នុងចំណោយនោះ មាន ១៦ ភាគរយបញ្ជាក់ថា ពួកគេបានលេង TikTok រយៈពេលជាច្រើនម៉ោងក្នុងមួយថ្ងៃៗ ។  

នាពេលកន្លងមក​ កម្មវិធី TikTok របស់ចិនមួយនេះ ត្រូវបានអាមេរិក ​ក៏ដូចជាប្រទេសមួយចំនួនផ្សេងទៀត ហាមឃាត់មិនឲ្យប្រើប្រាស់ឡើយនៅក្នុងជួររដ្ឋាភិបាល ដោយសារព្រួយបារម្ភពីចារកម្មចិនចូលលុកលុយទិន្នន័យ ។

សូមបញ្ជាក់ថា ក្រុមហ៊ុនមេរបស់ TikTok គឺ ByteDance កំពុងប្រឈមមុខនឹងការស៊ើបអង្កេតពីគណៈកម្មាធិការវិនិយោគបរទេសនៅសហរដ្ឋអាមេរិក ដែលត្រូវបានគេស្គាល់ថា CFIUS ជុំវិញបញ្ហាសន្តិសុខជាតិ ។ ការស៊ើបអង្កេតនេះកំពុងដំណើរការអស់រយៈពេលជាច្រើនឆ្នាំ ចាប់តាំងពីក្រុមហ៊ុន ByteDance បានទិញកម្មវិធី Musical.ly ក្នុងឆ្នាំ ២០១៧ ប៉ុន្តែបានពន្លឿនការពិនិត្យមើលទាំងវិសាលភាព និងផ្នែកផ្សេងៗក្នុងប៉ុន្មានខែថ្មីៗនេះ ៕

ប្រែសម្រួលដោយ ៖ នាង រតនៈ

ប្រភព ៖ CNBC

ចុចអាន ៖ ថៃ សហការជាមួយ TikTok ប្រយុទ្ធប្រឆាំងព័ត៌មានក្លែងក្លាយ ទាក់ទងការបោះឆ្នោត