​កម្ពុជានាំចូល​រថយន្ត​គ្រួសារ​មានទំហំជាង ​៧៧០ ​លានដុល្លារ កើនឡើង​ខ្ពស់​

ទឹកប្រាក់ ៧៧៣ ​លានដុល្លារ ​ត្រូវបានចំណាយ​លើការនាំចូលរថយន្ត​លក្ខណៈគ្រួសារ​មកកម្ពុជា នៅក្នុងរយៈពេល ៩ ខែ ឆ្នាំ ២០២៥ មានការកើនឡើង ២៨៧,៤០% ធៀបនឹងរយៈពេលដូចគ្នា កាលពីឆ្នាំមុន ដែលមានទំហំ ៤៨៦ លានដុល្លារ។​ នេះបើតាមក្រសួងពាណិជ្ជកម្ម។

​លោក ងន សាំង អគ្គនាយកក្រុមហ៊ុន អ អិម អេ ខេមបូឌា មានប្រសាសន៍ថា ​ទីផ្សាររថយន្តនៅកម្ពុជា មានកំណើនពីមួយ​ឆ្នាំទៅមួយឆ្នាំ បន្ទាប់ពីវិបបត្តិជំងឺកូវីដ១៩។ កំណើន​នៃទីផ្សាររថយន្ត ដោយសារប្រជាជនកម្ពុជាសម្បូរដោយវ័យ​ក្មេង ហើយដល់ពេលដែលពួក​គាត់មានតម្រូវការរថយន្ត។

​ម្យ៉ាងទៀតស្ថានភាពសេដ្ឋកិច្ចកម្ពុជាមានភាពល្អប្រសើរជាងមុន មនុស្សម្នាក់ៗ មានការងារធ្វើ ដែលនាំឱ្យពួកគាត់មានចំណូលច្រើនជាងមុន ហើយធ្វើឱ្យមានតម្រូវការរថយន្ត ក៏កើនឡើងដែរ ខណៈអ្នកវិនិយោគ ក៏ច្រើនជាងមុនដែរ ព្រោះអ្នកវិនិយោគក៏ត្រូវការវិនិយោគច្រើនជាងមុនដែរ។​

​នៅក្នុងឆ្នាំ២០២៤ កម្ពុជាបានចំណាយប្រាក់ជាង១ពាន់លានដុល្លារ ក្នុងការនាំចូលនូវ​យានយន្តគ្រប់ប្រភេទធៀបនឹងឆ្នាំ២០២៣​ ដែលមានទឹកប្រាក់សរុបជិត៩០៣លានដុល្លារ៕

អត្ថបទ៖ ឡេង ដេត