Samsung ដំឡើងថ្លៃបន្ទះឈីបអង្គចងចាំរហូតដល់ ៦០% ខណៈ​កង្វះការផ្គត់ផ្គង់កើនឡើង

ក្រុមហ៊ុនបច្ចេកវិទ្យា Samsung Electronics បានដំឡើងថ្លៃលើបន្ទះឈីបអង្គចងចាំមួយចំនួន ខ្ពស់រហូតដល់ ៦០% រាប់ចាប់តាំងពីខែកញ្ញាមក ​នៅពេល​ការផ្គត់ផ្គង់ប្រឈមនឹង​កង្វះខាត ចំពេលដែល​តម្រូវការសម្រាប់ការអភិវឌ្ឍ​មជ្ឈមណ្ឌលទិន្នន័យបញ្ញាសិប្បនិម្មិត(AI) កើនឡើងទូទាំងពិភពលោក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ដែលស្រង់សម្ដីប្រភព២រូប។

ការបង្កើនតម្លៃ​ដដែល ធ្វើឡើង​ក្រោយ​​ពីក្រុមហ៊ុន Samsung ដែលជាក្រុមហ៊ុនផលិតបន្ទះឈីបអង្គចងចាំធំជាងគេបំផុតរបស់ពិភពលោក បានពន្យារពេលប្រកាសតម្លៃកិច្ចសន្យាប្រចាំខែតុលារបស់ខ្លួន ទោះបីជាតម្លៃបែបនេះ ជាធម្មតា ត្រូវបានកំណត់​ជារៀងរាល់ខែក៏ដោយ​។ នេះបើតាមការសម្ដីប្រភព។ ​

​បន្ទះឈីបអង្គចងចាំ ​ភាគច្រើនត្រូវបានគេប្រើប្រាស់នៅក្នុងម៉ាស៊ីនមេ។ ការបង្កើនតម្លៃយ៉ាងខ្លាំងរបស់ក្រុមហ៊ុន Samsung នឹងដាក់សម្ពាធកាន់តែខ្លាំងទៅលើក្រុមហ៊ុនធំៗក្នុងការពង្រីកហេដ្ឋារចនាសម្ព័ន្ធទិន្នន័យរបស់ពួកគេ។ វាក៏អាចបង្កើនតម្លៃផលិតផលផ្សេងទៀតដែលប្រើប្រាស់បន្ទះឈីបទាំងនេះផងដែរ ដូចជាស្មាតហ្វូន និងកុំព្យូទ័រ។

Samsung មិនទាន់ប្រតិកម្មយ៉ាងណាទេ ជុំវិញបញ្ហានេះ។ ​ដោយឡែកពីគ្នា ក្រុមហ៊ុន​បានប្រកាស​កាលពីថ្ងៃអាទិត្យថា ខ្លួននឹងសាងសង់​កន្លែង​ផលិតកម្មបន្ទះឈីបថ្មីមួយនៅ​កូរ៉េខាងត្បូង ដោយរំពឹងថា AI នឹងជំរុញតម្រូវការក្នុងរយៈពេលមធ្យម និងរយៈពេលវែង។

នាយកប្រតិបត្តិពីក្រុមហ៊ុនក្នុងឧស្សាហកម្ម និងអ្នកវិភាគផ្សេងៗ បាននិយាយថា កង្វះខាតបន្ទះឈីបបានក្លាយជាធ្ងន់ធ្ងរខ្លាំង ដែលអតិថិជនមួយចំនួនកំពុងទិញដោយភ័យស្លន់ស្លោ។ ក្រុមហ៊ុនផលិតបន្ទះឈីបកិច្ចសន្យាកំពូលៗរបស់​ចិន គឺ SMIC បាននិយាយកាលពីថ្ងៃសុក្រសប្ដាហ៍ថា​ កង្វះខាតបន្ទះឈីបអង្គចងចាំ បាននាំឱ្យអតិថិជនពន្យារពេលការបញ្ជាទិញ​បន្ទះឈីបផ្សេងទៀតដែលប្រើក្នុងផលិតផលរបស់ពួកគេ។

ក្រុមហ៊ុនផលិតផលស្មាតហ្វូន Xiaomi ​ឯណោះវិញ បានព្រមានកាលពីខែមុនថា តម្លៃបន្ទះឈីបអង្គចងចាំដែលកើនឡើងខ្ពស់ បានបង្កើនថ្លៃដើមនៃការផលិតស្មាតហ្វូន៕