ព័ត៌មានអន្ដរជាតិ

ចិនជំរុញកុំឱ្យក្រុមហ៊ុនក្នុងស្រុកប្រើឈីប H20 របស់ក្រុមហ៊ុនអាមេរិក Nvidia

បានផុស

៩ ខែ មុន

នៅ

ថ្ងៃអង្គារ ១២ សីហា ២០២៥

ដោយ

រដ្ឋាភិបាលចិនចេញសេចក្ដីណែនាំថ្មី ដោយជំរុញកុំឱ្យក្រុមហ៊ុនក្នុងស្រុកប្រើប្រាស់បន្ទះឈីប H20 របស់ក្រុមហ៊ុនអាមេរិក Nvidia ជាពិសេសការប្រើប្រាស់ពាក់ព័ន្ធនឹងរដ្ឋាភិបាល។

សារព័ត៌មាន Bloomberg បានស្រង់សម្ដីប្រភពដឹងពីបញ្ហានេះដោយមិនបញ្ចេញឈ្មោះថា ក្នុងរយៈពេលប៉ុន្មានសប្តាហ៍កន្លងមកនេះ អាជ្ញាធរចិនបានជូនដំណឹងទៅកាន់ក្រុមហ៊ុនជាច្រើន ដោយជំរុញពួកគេកុំឱ្យប្រើប្រាស់បន្ទះឈីប H20 ដែលជាប្រភេទបន្ទះឈីបមិនសូវទំនើប។

ប្រភពដដែលបន្តថា ការណែនាំថ្មី គឺតឹងរុឹងខ្លាំង ជាពិសេសចំពោះការប្រើប្រាស់បន្ទះ H20 ក្នុងគម្រោងរបស់សហគ្រាសរដ្ឋ ឬឯកជន ដែលជាប់ពាក់ព័ន្ធនឹងការងាររបស់រដ្ឋាភិបាល ឬសន្តិសុខជាតិ។

ការណែនាំរបស់ចិន មិនត្រឹមតែប៉ះពាល់ដល់បន្ទះឈីប Nvidia ប៉ុណ្ណោះទេ ប៉ុន្តែក៏ប៉ះពាល់ដល់បន្ទះឈីប AI ពីក្រុមហ៊ុន AMD ផងដែរ។

សេចក្ដីរាយការណ៍ពីបញ្ហានេះ ធ្វើឡើងក្រោយពេលដែលក្រុមហ៊ុន Nvidia និងក្រុមហ៊ុន AMD ទទួលបានការអនុញ្ញាតពីសហរដ្ឋអាមេរិក ក្នុងការលក់បន្ទះឈីបកម្រិតអន់ ឱ្យទៅចិន ជាថ្នូរនឹងការផ្ដល់ប្រាក់ចំណូល ១៥ ភាគរយ ទៅកាន់រដ្ឋាភិបាលអាមេរិក។ ជំហានរបស់ចិន កំពុងបន្ថែមសម្ពាធដល់ក្រុមហ៊ុនទាំង២ ដោយធ្វើឱ្យរាំងស្ទះការទិញបន្ទះឈីបពីក្រុមហ៊ុនអាមេរិកទាំង២៕