ព័ត៌មានអន្ដរជាតិ

រញ្ជួយដី៦,៣រិចទ័រនៅឥណ្ឌូណេស៊ី ខណៈគ្រោះទឹកជំនន់មិនទាន់ថមថយនៅឡើយ

បានផុស

៥ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

Chheang

កោះស៊ូម៉ាត្រារបស់ឥណ្ឌូណេស៊ី បានរងការវាយប្រហារដោយរញ្ជួយដីកម្រិត៦,៣រិចទ័រនាថ្ងៃព្រហស្បតិ៍ទី២៧ខែវិច្ឆិកាឆ្នាំ២០២៥ ដែលបន្ថែមបញ្ហាប្រឈមដល់ប្រទេសអាស៊ីមួយនេះ ខណៈដែលទឹកជំនន់ភ្លាមៗ និងការបាក់ដីបានសម្លាប់មនុស្សប្រមាណ២៨នាក់រួចទៅហើយ។

ទីភ្នាក់ងារសារព័ត៌មាន Reuters បានរាយការណ៍ថា ការរញ្ជួយដីនេះមានចំណុចកណ្តាលនៅជិតខេត្ត Aceh ក្នុងជម្រៅ១០គីឡូម៉ែត្រ ហើយមិនបង្កឲ្យមានការគំរាមកំហែងរលកយក្សស៊ូណាមិនោះទេ។

មិនទាន់មានការកត់ត្រាពីចំនួនអ្នកស្លាប់ ឬការខូចខាតភ្លាមៗនៅឡើយទេ ប៉ុន្តែការរញ្ជួយដីនេះបានកើតឡើងនៅពេលដែលស៊ូម៉ាត្រាខាងជើងកំពុងជួបនឹងទឹកជំនន់ដ៏សាហាវដែលបង្កឡើងដោយភ្លៀងធ្លាក់ឥតឈប់ឈរពីព្យុះស៊ីក្លូន Senyar។ យោងតាមមន្ត្រីមូលដ្ឋាន មនុស្សយ៉ាងហោចណាស់២៨នាក់បានស្លាប់ ហើយរាប់សិបនាក់ទៀតនៅតែបាត់ខ្លួន។

កិច្ចខិតខំប្រឹងប្រែងជួយសង្គ្រោះត្រូវបានរារាំង ដោយសារបញ្ហាដាច់ផ្លូវ ការដាច់ចរន្តអគ្គិសនី និងភ្លៀងធ្លាក់ខ្លាំងបន្តបន្ទាប់ ដែលបណ្តាលឲ្យសហគមន៍មួយចំនួនត្រូវបានកាត់ផ្តាច់។ វីដេអូដែលបានចែករំលែកតាមអនឡាញបានបង្ហាញពីទឹកភក់គួចហូរកាត់ភូមិនានា ជន់លិចផ្ទះសម្បែង និងបង្ខំឲ្យអ្នកស្រុកត្រូវរកទីជម្រកនៅទួលខ្ពស់។

ប្រទេសឥណ្ឌូណេស៊ី ដែលស្ថិតនៅលើ«ខ្សែក្រវាត់ភ្នំភ្លើង»ប៉ាស៊ីហ្វិក ងាយនឹងជួបការរញ្ជួយដីញឹកញាប់ ការផ្ទុះភ្នំភ្លើង និងទឹកជំនន់តាមរដូវធ្ងន់ធ្ងរ។ អាជ្ញាធរបានព្រមានថា ភ្លៀងធ្លាក់បន្ថែមទៀតនាប៉ុន្មានថ្ងៃខាងមុខអាចធ្វើឲ្យស្ថានភាពកាន់តែអាក្រក់ទៅៗក្នុងតំបន់ដែលរងផលប៉ះពាល់រួចហើយ៕