តំណាង​វិស័យ​ទេសចរណ៍​ អំពាវនាវ​ដល់​ភ្ញៀវ​ទេសចរ​ឥណ្ឌា ​គួរពិចារណា​ទង្វើរ​បស់​ថៃប្រមាថសាសនាហិណ្ឌូនៅក្នុងទឹកដីកម្ពុជា

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATA) ​បានអំពាវ​នាវឱ្យ​ទេសចរ​ឥណ្ឌា​ពិចារណា​មុនពេលធ្វើដំណើរទៅប្រទេសថៃ ​បន្ទាប់ពីថៃ ​បានបង្ហាញ​ឥរិយាបថ​ប្រមាថ​សាសនាហិណ្ឌូ ​បំផ្លាញរូបសំណាកព្រះវិស្ណុនៅក្នុង​ទឹកដីកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងវិស័យទេសចរណ៍កម្ពុជា ​បានលើកឡើងបែបនេះ បន្ទាប់ពីយោធាថៃ បានបំផ្លិចបំផ្លាញរូប​សំណាក​ព្រះវិស្ណុនៃសាសនាហិណ្ឌូ​នៅតំបន់អានសេះ​ ​នៃខេត្តព្រះវិហារ ដែលបានធ្វើឱ្យប្រជាជន និងរដ្ឋាភិបាលឥណ្ឌា បានបង្ហាញការខឹងសម្បារ ក៏ដូចជាថ្កោលទោសចំពោះទង្វើរបស់់យោធាថៃ។​

​លោក ធួន ស៊ីណាន ​បញ្ជាក់ថា៖« ប្រជាជនឥណ្ឌាគួរតែពិចារណា ​មុនធ្វើដំណើរទៅកាន់គោលដៅ​ស្រុកថៃហ្នឹង គួរតែពិចារណាទៅលើសេចក្ដីប្រមាថអស់ហ្នឹង ដែលពួកថៃបានប្រព្រឹត្តមក​លើព្រះ​ដែល​យើងគោរពបូជា ការគោរបូជាព្រះវិស្ណុហ្នឹង មិនមែនតែ ជនជាតិឥណ្ឌាមួយទេ កម្ពុជា និង​ប្រជា​ជន​នៅលើពិភពលោកច្រើនណាស់ដែលគោរពបូជាព្រះវិស្ណុ ជាទេវដ៏សំខាន់នៅក្នុង​ព្រហ្មញ្ញ​សាសនា»។

លោក ធួន ស៊ីណាន ​បន្ថែមថា កម្ពុជាមានឫសគល់យ៉ាងជ្រៅនៅក្នុងការគោរពបូជា ប្រជាជន​ឥណ្ឌាដែលគោរពហិណ្ឌូ និងព្រះពុទ្ធគួរតែពិចារណា ហើយវិលត្រឡប់មកផ្សារ​ភ្ជាប់ប្រវត្តិសាស្ត្រ​ដើមជាមួយគ្នានឹងកម្ពុជាវិញ។ ឥណ្ឌាគួរតែមើល និងឱ្យតម្លៃទៅលើប្រទេស​ដែលមាន​ជំនឿ​ពិតប្រាកដ​ជាមួយគ្នាដូចកម្ពុជា៕