រាជរដ្ឋាភិបាលបំពេញកាតព្វកិច្ចសំខាន់ ៣ ធានាជីវិត សុវត្ថិភាព និងសេរីភាព ជូនវីរៈយុទ្ធជន ១៨ រូប

ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា ទោះបីជារយៈពេលកន្លងទៅមានភាពយូរបន្តិចក្តី ប៉ុន្តែរាជរដ្ឋាភិបាលកម្ពុជាមិនដែលភ្លេចបងប្អូនវីរៈយុទ្ធជននោះឡើយ។

តាមរយៈបណ្តាញសង្គមមុននេះ សម្តេចធិបតីបានលើកឡើងថា នៅថ្ងៃនេះ រាជរដ្ឋាភិបាលបានបំពេញកាតព្វកិច្ចសំខាន់ៗចំនួន ៣ ប្រការជូនវីរៈយុទ្ធជនទាំង ១៨ រូប ដែលត្រូវបានចាប់ខ្លួនកាលពីថ្ងៃទី ២៩ ខែកក្កដា ឆ្នាំ ២០២៥ សរុបរយៈពេល ១៥៥ ថ្ងៃគត់ ចាប់តាំងពីថ្ងៃកើតហេតុ។

កាតព្វកិច្ចសំខាន់ទាំង ៣ នោះ រួមមាន៖

១) ការធានាអាយុជីវិត

២) ការធានាសុខសុវត្ថិភាព

៣) ការស្វែងរក និងទទួលបានសេរីភាព ជូនបងប្អូនវីរៈយុទ្ធជនទាំងអស់។

សម្តេចធិបតី ហ៊ុន ម៉ាណែត បានសម្ដែងនូវការអបអរសាទរយ៉ាងកក់ក្តៅ ចំពោះការទទួលបានសេរីភាព និងការវិលត្រឡប់មកជួបជុំគ្រួសារវិញរបស់វីរៈយុទ្ធជនទាំង ១៨ រូប ដែលជាលទ្ធផលនៃការខិតខំប្រឹងប្រែង និងការទទួល ខុសត្រូវខ្ពស់របស់រាជរដ្ឋាភិបាល ក្នុងការការពារ និងថែរក្សាប្រយោជន៍របស់កងកម្លាំង និងប្រជាពលរដ្ឋកម្ពុជា។

សម្តេចធិបតីធ្លាប់បានបញ្ជាក់ថា រាជរដ្ឋាភិបាលនឹងបន្តអនុវត្តគោលនយោបាយប្រកបដោយការទទួលខុសត្រូវ និងមិនបោះបង់ចោលអ្នកណាម្នាក់ឡើយ នៅគ្រប់កាលៈទេសៈ៕