ការសិក្សាថ្មីរកឃើញប្រសិទ្ធភាពវ៉ាក់សាំងការពារកូវីដ-១៩ សម្រាប់អ្នកជំងឺមហារីក

ការស្រាវជ្រាវថ្មីដែលចេញផ្សាយដោយ JAMA Oncology បានរកឃើញថា វ៉ាក់សាំងការពារកូវីដ-១៩ មានប្រសិទ្ធភាពសម្រាប់អ្នកជំងឺមហារីក ទោះបីប្រព័ន្ធភាពស៊ាំឆ្លើយតបតិចជាងអ្នកដែលមិនមានជំងឺក៏ដោយ។

៩០ ភាគរយនៃអ្នកជំងឺដែលមានមហារីក បន្ទាប់ពីបានចាក់វ៉ាក់សាំង Pfizer-BioNTech ចំនួនពីរដង រយៈពេល ២ សប្តាហ៍ក្រោយមក ពួកគេតេស្តឃើញមានអង់ទីគ័រប្រឆាំងនឹងវីរុសកូវីដ-១៩។

អ្នកស្រាវជ្រាវនិយាយថា ទោះបីជាកម្រិតនៃអង់ទីគ័រដែលប្រឆាំងនឹងវីរុសមានកម្រិតទាបជាងអ្នកដែលមិនមានជំងឺមហារីកប្រហែល ៧០ ភាគរយក៏ដោយ ក៏ពួកគេនៅតែអាចបង្កើតអង់ទីគ័រការពារប្រឆាំងនឹងការឆ្លងមេរោគបានខ្ពស់ដដែល។

បើយោងតាមការសិក្សាពីមុន វ៉ាក់សាំងពីរដូសរបស់ក្រុមហ៊ុន Pfizer-BioNTech និង Moderna មានប្រសិទ្ធភាពជាង ៩០% ក្នុងការការពារមិនឱ្យកើតជំងឺធ្ងន់ធ្ងរ បន្ទាប់ពីឆ្លងវីរុសកូវីដ ដែលនេះបង្ហាញថា វាក៏មានប្រសិទ្ធភាពការពារអ្នកជំងឺរ៉ាំរ៉ៃរួមទាំងអ្នកជំងឺមហារីកផងដែរ។

លោក Stemmer សាស្ត្រាចារ្យផ្នែកជំងឺមហារីកនៅមជ្ឈមណ្ឌលវេជ្ជសាស្ត្រ Rabin ប្រទេសអ៊ីស្រាអែល បានប្រៀបធៀបការឆ្លើយតបរបស់ប្រព័ន្ធភាពស៊ាំទៅនឹងវ៉ាក់សាំង Pfizer-BioNTech ចំពោះអ្នកជំងឺមហារីកចំនួន ១០២ នាក់ ជាមួយនឹងមនុស្ស ៧៨ នាក់ដែលមិនមានជំងឺនេះ។

លទ្ធផលបង្ហាញថា អ្នកគ្មានជំងឺមហារីកចំនួន ១០០% មានអង់ទីគ័រប្រឆាំងនឹងការចម្លងមេរោគ ក្រោយពីរសប្តាហ៍បន្ទាប់ពីបានទទួលវ៉ាក់សាំង ខណៈដែលអ្នកជំងឺមហារីក ៩០% ក៏អាចបណ្ដុះអង់ទីគ័រការពារវីរុសបានដែរ។

ក្រោយការសិក្សា វេជ្ជបណ្ឌិត Stemmer រំពឹងថា អ្នកជំងឺមហារីកទាំងអស់នឹងមានប្រតិកម្មភាពស៊ាំខ្លាំងជាមួយវ៉ាក់សាំងការពារ COVID-19 ដទៃទៀត ដូចគ្នាទៅនឹងការសាកល្បងវ៉ាក់សាំង Pfizer-BioNTech ដូច្នោះដែរ៕

ប្រែសម្រួល៖ សន្យា

ប្រភព៖ UPI

ចុចអាន៖ អង់គ្លេស​អះអាង​ការ​សិក្សា​ថ្មី​ថា​ វ៉ាក់សាំង​ Pfizer​ និង​ AZ មាន​ប្រសិទ្ធភាព​ខ្ពស់​ប្រឆាំង​វីរុស​បំប្លែង​ខ្លួន​ឥណ្ឌា

ចុចអាន៖ ចាក់វ៉ាក់សាំងកូវីដ-១៩ រួចទាំង ២ដូស អាចមានប្រសិទ្ធភាពបានប៉ុន្មានទៅ?