ព័ត៌មានជាតិ

អតីតយុទ្ធជន ១២គ្រួសារ ទទួលជំនួយពីប្រធានសមាគមអតីតយុទ្ធជនកម្ពុជា ខេត្តកំពង់ធំ

បានផុស

៥ years មុន

នៅ

ថ្ងៃអង្គារ ២៧ កក្កដា ២០២១

ដោយ

អតីតយុទ្ធជនពិការ និងគ្រួសារអតីតយុទ្ធជនពលីចំនួន១២គ្រួសារ រស់នៅក្នុងក្រុងស្ទឹងសែន ខេត្តកំពង់ធំ មានជីវភាពខ្វះខាតស្បៀងអាហារ ដើម្បីដោះស្រាយដល់ក្រុមគ្រួសារប្រចាំថ្ងៃ និងបានទទួលការជួយឧបត្ថម្ភ ពីប្រធានសមាគមអតីតយុទ្ឋជនកម្ពុជាខេត្តកំពង់ធំ នៅព្រឹកថ្ងៃទី២៧ ខែកក្កដា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ បានមានប្រសាសន៍ថា បញ្ហាការឆ្លងរីករាលដាលមេរោគកូវីដ១៩ បានឆ្លងចូលដល់សហគមន៍ និងនៅតាមមូលដ្ឋានមួយចំនួននៅក្នុងខេត្តកំពង់ធំ កំណើនអ្នកឆ្លងកាន់តែច្រើនឡើងជារៀងរាល់ថ្ងៃ ធ្វើឲ្យមានការប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់ប្រជាពលរដ្ឋ ក៏ដូចជា បងប្អូនក្រុមគ្រួសារអតីតយុទ្ធជន ដែលមិនអាចទៅប្រកបមុខរបរអ្វីដើម្បីយកមកចិញ្ចឹមជីវិតបាន។ ដោយថ្ងៃនេះ មេបញ្ជាការតំបន់ប្រតិបត្តិការសឹករងកំពង់ធំ ដឹកនាំសហការី នាំយកគ្រឿងឧបភោគបរិភោគ ដែលបានជួយឧបត្ថម្ភ ពីសប្បុរសជននានា ឧបត្ថម្ភជូនក្នុងមួយគ្រួសារទទួលបាននូវអង្ករ២៥ គីឡូក្រាម មី១កេស, ទឹកត្រី ១យួរ, ត្រីខកំប៉ុង១យួរ, ទឹកសុទ្ធ១យួរ និងត្រូវបានចែកជូន នៅសង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ។

ឧត្តមសេនីយ៍ទោ សោម ស៊ុន ក៏បានពាំនាំនូវការផ្ដាំផ្ញើសាកសួរសុខទុក្ខពី សំណាក់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និង សម្ដេចកិត្តិព្រឹទ្ធបណ្ឌិត បានយកចិត្តទុកដាក់ខ្ពស់ពីសុខទុក្ខនិងជីវភាពរស់នៅរបស់បងប្អូនអតីតយុទ្ធជន ជាពិសេសនៅក្នុងកាលៈទេសៈប្រទេសកម្ពុជាកំពុងរងផលប៉ះពាល់ ដោយការឆ្លងរីករាលដាលនៃមេរោគកូវីដ។

ឧត្តមសេនីយ៍ទោ សោម ស៊ុន បានសំណូមពរបងប្អូនអតីតយុទ្ធជន និងក្រុមគ្រួសារ ត្រូវខិតខំថែរក្សាសុខភាពការពារខ្លួនឲ្យជៀសផុតពីការឆ្លងមេរោគកូវីដ១៩ ដោយត្រូវអនុវត្តឲ្យបានត្រឹមត្រូវ តាមការណែនាំរបស់ក្រសួងសុខាភិបាល ពិសេសអនុវត្តនូវវិធានការ3កុំនឹង3ការពារ របស់សម្ដេចតេជោ ហ៊ុន សែន ឲ្យបានត្រឹមត្រូវ ។

ក្រុមគ្រួសារអតីតយុទ្ធជនពិការ និងគ្រួសារអតីតយុទ្ធជនពលី បានគោរពថ្លែងអំណរគុណដ៏សប្បុរសជននានា តាមរយៈគណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ ដែលបាននាំស្បៀងមកជួយឧបត្ថម្ភ បានទាន់ពេលវេលា ខណៈពេលដែលកំពុងតែខ្វះខាត និងសូមគោរពជូនពរ ដល់ក្រុមការងារសមាគមអតីតយុទ្ធជនកម្ពុជាខេត្តកំពង់ធំ សូមបានជួបប្រទះតែនឹងពុទ្ធពរទាំងប្រាំប្រការកុំបីឃ្លៀងឃ្លាតឡើយ៕

អត្ថបទ៖ ប៊ុន រដ្ឋា