កីឡា

ប្រធានក្រុមម៉ាឡេស៊ីព្រមាន«កម្ពុជាមិនដូចពីមុនទេ ត្រូវប្រយ័ត្នមែនទែន»

បានផុស

៥ years មុន

នៅ

ថ្ងៃចន្ទ ៦ ធ្នូ ២០២១

ដោយ

ប្រធានក្រុមបាល់ទាត់ជម្រើសជាតិម៉ាឡេស៊ី កីឡាករ Aidil Zafuan Radzak បានស្វែងយល់ច្រើនពីក្រុមបាល់ទាត់ជម្រើសជាតិកម្ពុជា និងបានព្រមានដល់ក្រុមរបស់ខ្លួនថា ត្រូវតែប្រុងប្រយ័ត្នមែនទែន នៅពេលក្រុមទាំងពីរត្រូវប៉ះគ្នាបើកឆាកពូល B ពាន AFF Cup នៅប្រទេសសិង្ហបុរីវេលាម៉ោង៤:៣០នាទីល្ងាចនេះ។

ដាក់គោលដៅឡើងឲ្យវគ្គផ្តាច់ព្រ័ត្រពានរង្វាន់ AFF Cup ឆ្នាំនេះ ម៉ាឡេស៊ីបានប្តេជ្ញាដាច់ខាតត្រូវតែយកឈ្នះកម្ពុជាដើម្បីទទួលបាន៣ពិន្ទុបង្កើនទំនុកចិត្តប្រកួតបន្ទាប់ក្នុងវគ្គសន្សំពិន្ទុតាមពូល។

ទោះបីជាយ៉ាងណា ប្រធានក្រុមវ័យ៣៤ឆ្នាំ Aidil បានរកឃើញថា ក្រុមកម្ពុជាមិនមែនជាក្រុមដែលងាយស្រួលយកឈ្នះដូចពីមុនទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករបម្រើការពារកណ្តាលនិយាយថា ៖«យើងបានសិក្សាពីហ្គេមរបស់កម្ពុជាច្រើន។ ពួកគេពិតជាខុសប្លែកស្ទើរទាំងស្រុងឥឡូវនេះ បើប្រៀបធៀបនឹងយើងឃើញកាលពីឆ្នាំ២០១៨»។

«របៀបលេងរបស់ពួកគេខុសប្លែក។ ពួកគេលេងគ្រប់គ្រងបាល់។ យើងមិនអាចគិតថា ពួកគេគ្មានហានិភ័យដូចពីមុន ឬគិតថា ងាយស្រួលឈ្នះនោះទេ។ កម្ពុជាផ្លាស់ប្តូរច្រើនណាស់ក្នុងរយៈពេលពីរបីឆ្នាំចុងក្រោយនេះ»។

ទន្ទឹមជាមួយគ្នានេះ ប្រធានក្រុមម៉ាឡេស៊ីទទួលស្គាល់ថា ម៉ាឡេស៊ីត្រៀមខ្លួនមិនបានល្អទេដោយសារកីឡាករជាប់ប្រកួតលីគ។ វាមិនងាយស្រួលសម្រាប់ក្រុមយកឈ្នះនោះទេ ពីព្រោះលីគប្រើពេលយូរ។

កីឡាករ Aidi មានប្រធានពិសោធច្រើនលើឆាកអន្តរជាតិក្នុងនោះធ្លាប់បង្ហាញខ្លួនឲ្យក្រុមជម្រើសជាតិម៉ាឡេស៊ីលើឆាកអន្តរជាតិបាន៩៣ដង និងជាកីឡាករដ៏សំខាន់ដើម្បីជំរុញនាំផ្លូវកីឡាករវ័យក្មេង។

សម្រាប់ក្រុមជម្រើសជាតិកម្ពុជាបានឈប់សម្រាកយូរជាងម៉ាឡេស៊ីដោយសារលីគកំពូលកម្ពុជាបានចប់មុនម៉ាឡេស៊ី៩ថ្ងៃ។

គិតចាប់តាំងពីឆ្នាំ១៩៩៦មក ក្រុមកម្ពុជា និងម៉ាឡេស៊ី ធ្លាប់ជួបគ្នា៣ដងក្នុងវគ្គចែកពូលសន្សំពិន្ទុនៃពានរង្វាន់នេះ។ សម្រាប់ការជួបគ្នាទាំង៣នេះកម្ពុជាមិនដែលឈ្នះម៉ាឡេស៊ីឡើយ ប៉ុន្តែបានកាត់បន្ថយពីគេស៊ុតចូលគ្រាប់ច្រើនមកតិច។