អភិបាលខេត្តប៉ៃលិន ណែនាំពង្រឹងសន្តិសុខសណ្តាប់ធ្នាប់ ដំណើរការប្រឡងបាក់ឌុប

លោក ស្រី បាន ស្រីមុំ អភិបាលខេត្តប៉ៃលិន បានណែនាំដល់កងកម្លាំងមានសមត្ថកិច្ច ត្រូវរៀបចំសន្តិសុខ សណ្តាប់ធ្នាប់ ក្នុងពេលប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅ នាថ្ងៃទី ២៧ ខែធ្នូ ឆ្នាំ ២០២១ ខាងមុខនេះ ឱ្យបានល្អប្រសើរ។

នៅ ក្នុងកិច្ចប្រជុំរៀបចំសន្តិសុខ សណ្តាប់ធ្នាប់ក្នុងពេលប្រឡងសញ្ញាបត្រមធ្យមសិក្សាទុតិយភូមិ កាលពីរសៀលថ្ងៃទី ១៤ ខែធ្នូ លោក ស្រី បាន ស្រីមុំ បានណែនាំដល់កងកម្លាំងមានសមត្ថកិច្ច ត្រូវត្រួតពិនិត្យរាល់សកម្មភាព ដែលមិនប្រក្រតីនៅ បរិវេណមណ្ឌលប្រឡង ហើយរដ្ឋបាលក្រុង ត្រូវចុះត្រួតពិនិត្យ តាមដានសកម្មភាព និងណែនាំដល់ម្ចាស់ទីតាំងអាជីវកម្មម៉ាស៊ីនថតចម្លង ដែលមានទីតាំងនៅ ក្បែរវិទ្យាល័យ ហ៊ុន សែន ក្រុងទេពនិម្មិត ចាប់ពីថ្ងៃទី ២៣ ខែធ្នូ ឆ្នាំ ២០២១ តទៅ រហូតដល់ចប់ដំណើរការប្រឡង។

នៅ ក្នុងឱកាសនោះ លោកស្រី បាន ស្រីមុំ បានមានប្រសាសន៍ណែនាំដល់ គណៈកម្មការប្រឡង សហការជាមួយយុវជនសហភាពសហព័ន្ធកម្ពុជាខេត្ត រៀបចំម៉ាស៊ីនវាស់កំដៅ អាកុល និងម៉ាសសម្រាប់ចែកដល់សិស្សានុសិស្ស ដែលមកប្រឡងឱ្យបានត្រឹមត្រូវ។ ចំណែកមន្ទីរសុខាភិបាលខេត្ត ត្រូវរៀបចំរថយន្តសង្រ្គោះមួយគ្រឿងនៅ ប្រចាំការកន្លែងមណ្ឌលប្រឡង ដើម្បីត្រៀមជួយសង្គ្រោះសិស្សានុសិស្សជាបេក្ខជន នៅ ពេលមានបញ្ហាអ្វីមួយជាយថាហេតុដូចជា វិលមុខ ចុកពោះ និងខ្យល់គរជាដើម។

លោក តង់ ធារា ប្រធានមន្ទីរអប់រំ យុវជន និងកីឡា ខេត្តប៉ៃលិន បានឱ្យដឹងថា សម្រាប់ឆ្នាំ ២០២១ នេះ ខេត្តប៉ៃលិន មានបេក្ខជន ដែលមានឈ្មោះប្រឡងសញ្ញាបត្រមធ្យមសិក្សាទុតិយភូមិ សរុបចំនួន ៥០៥ នាក់ ស្រី ២៧៧ នាក់  និងមានមណ្ឌលប្រឡងចំនួន ០២ មណ្ឌល រួមមាន មណ្ឌលវិទ្យាសាស្រ្តសង្គម មានបន្ទប់ប្រឡងចំនួន ១៥ បន្ទប់ មានបេក្ខជនចំនួន ៣៥១ នាក់ ស្រី ១៩៤នាក់ និង មណ្ឌលវិទ្យាសាស្រ្ត មានបន្ទប់ប្រឡងចំនួន ៧ បន្ទប់ មានបេក្ខជនចំនួន ១៥៤ នាក់ ស្រី ៩៣នាក់៕

អត្ថបទ៖ សំអឿន