អ្នកនាំពាក្យគណបក្សប្រជាជន៖បេក្ខភាពជានាយករដ្ឋមន្រ្តីរបស់លោក ហ៊ុន ម៉ាណែត នៅពេលអនាគតនឹងប្រជែងឈ្នះគណបក្សនយោបាយជ្សេង

លោកសួស យ៉ារ៉ា អ្នកនាំពាក្យគណបក្សប្រជាជនកម្ពុជា(CPP)បានអះអាងថាបេក្ខភាពលោក ហ៊ុន ម៉ាណែត ជានាយករដ្ឋមន្ត្រីនៅពេលអនាគតនឹងប្រជែងឈ្នះប្រជាប្រិយ ភាពជាមួយគណបក្សផ្សេងៗក្នុងការបោះឆ្នោត។

លោក សួស យ៉ារ៉ា បានថ្លែងក្នុងសន្នីសីទសារព័ត៌មានព្រឹកថ្ងៃទី២៤ ខែធ្នូថា៖ «អ្វីដែលយើងជឿរជាក់នោះគឺលោក ហ៊ុន ម៉ាណែត គឺកុលបុត្រខ្មែរមួយដែលមានចំណេះដឹង ទាំងផ្នែកវិទ្យាសាស្ត្រ ចំណេះធ្វើ ហើយតស៊ូក្នុងបេសកកម្មនានាសម្រាប់ជាតិដោយមិនដែលត្អូញត្អែនឿយហត់និងតវ៉ានោះទេ ។សម្រាប់ការប្រជែងបេក្ខជនជានាយករដ្ឋមន្ត្រី ចំពោះលោក ហ៊ុន ម៉ាណែត គឺបើកសេរីចំពោះគណបក្សនយោបាយផ្សេងៗក្នុងការប្រជែងក្នុងការបោះឆ្នោត »។

លោកក៏បានអះអាងផងដែរសម្រាប់ការដាក់បេក្ខភាពលោក ហ៊ុន ម៉ាណែត ជានាយករដ្ឋមន្ត្រីនៅពេលអនាគតគឺមានការឯកភាពផ្ទៃក្នុងរបស់គណបក្សក្រោមការដឹកនាំ របស់សម្តេចតេជោ ហ៊ុន សែន ហើយអ្វីដែលឯកភាពនោះគឺគុណតម្លៃនិងគុណសម្បត្តិរបស់លោក ហ៊ុន ម៉ាណែត ជាមួយគ្នានោះដែរអ្នកនាំពាក្យដដែលបានអះអាងទៀត ថាសម្រាប់ការរៀបចំដឹកនាំក្បាលម៉ាស៊ីនរបស់គណបក្សក៏ដូចជាស្ថាប័នមួយចំនួនទៀតថ្នាក់ដឹកនាំនឹងរៀបចំឱ្យដំណើរដោយរលូនដោយមិនឱ្យកើតមានបញ្ហានោះទេ ៕

អត្ថបទ៖ណារី