ភ្នំភ្លើងក្រោមទឹកផ្ទុះនៅ តុងហ្គាកើតឡើងម្តងប៉ុណ្ណោះ ក្នុងរយៈពេលរាប់ពាន់ឆ្នាំ

ភ្នំភ្លើងក្រោមទឹកដែលផ្ទុះនៅប្រទេសតុងហ្គាកាលពីថ្ងៃអាទិត្យទី១៦ខែមករា គឺជា “ការផ្ទុះដ៏ធំ” ដែលកើតឡើងម្តងប៉ុណ្ណោះ ក្នុងរយៈពេលរាប់ពាន់ឆ្នាំ ហើយមានទំហំធំណាស់ ដែលគេអាចមើលឃើញពីលំហបាន។

ការផ្ទុះនេះបានបង្កឲ្យមានការរញ្ជួយដីកម្រិត៧.៤រ៉ិចទ័រ និងបានបណ្តាលឲ្យមានរលកយក្សស៊ូណាមិ វាយប្រហារឆ្នេរសមុទ្រនៃប្រជុំកោះប៉ាស៊ីហ្វិកមួយនេះ ធ្វើឲ្យកោះត្រូវគ្របដណ្តប់ដោយផេះនិងកាត់ផ្តាច់ជំនួយ។

រូបភាពពីផ្កាយរណបបានបង្ហាញពីការផ្ទុះដ៏ធំ ហើយបើទោះបីជាមានការព្រមានយ៉ាងខ្លាំងក៏ដោយ ក៏មនុស្សបានសម្រុកទៅឆ្នេរសមុទ្រដើម្បីមើលរលកយក្សស៊ូណាមិដែលមានកម្ពស់ខ្ពស់។

ប្រទេសតុងហ្គា នៅតែមិនអាចទាក់ទងបានកាលពីថ្ងៃអាទិត្យ ដោយទំនាក់ទំនងតាមទូរសព្ទ និងអ៊ីនធើណិតត្រូវបានកាត់ផ្តាច់។ សាច់ញាតិនៅប្រទេសនូវែលសេឡង់ បាននាំគ្នាអធិស្ឋានសម្រាប់ក្រុមគ្រួសាររបស់ពួកគេនៅលើកោះប៉ាស៊ីហ្វិកមួយនេះ ខណៈរបាយការណ៍ស្តីពីជនរងគ្រោះមិនទាន់ចេញនៅឡើយ។

ពពកផេះដ៏ធំ ដែលគ្របដណ្តប់លើប្រទេសកោះដ៏តូចមួយនេះ កំពុងរារាំងមិនឲ្យជើងហោះហើរឃ្លាំមើលចេញពីប្រទេសនូវែលសេឡង់ ទៅវាយតម្លៃអំពីទំហំនៃការខូចខាត។

ការព្រួយបារម្ភភ្លាមៗនៅតុងហ្គាគឺសម្រាប់សុវត្ថិភាពខ្យល់ និងទឹក ដោយសារតែផេះ និងផ្សែង។ រដ្ឋាភិបាល​បាន​ស្នើ​ឲ្យ​សាធារណជន​ពាក់​ម៉ាស និង​ប្រើប្រាស់​ទឹក​ដបនា​ពេល​បច្ចុប្បន្ននេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ជប៉ុន កំពុងរងការវាយប្រហារពីរលកយក្សស៊ូណាមិសាជាថ្មី