លោក ថាក់ស៊ីន និង យីងឡាក់ ប្រទះឃើញមកលេងប្រទេសជិតខាង ថៃ

អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា និងប្អូនស្រី យីងឡាក់ ស៊ីណាវ៉ាត្រា ត្រូវបានគេប្រទះឃើញមកទស្សនានៅរដ្ឋ Penang របស់ប្រទេសម៉ាឡេស៊ី ដែលជាប្រទេសជិតខាងថៃ ។

កាសែត The Star របស់ម៉ាឡេស៊ីបានរាយការណ៍កាលពីថ្ងៃព្រហស្បតិ៍ថា បងប្អូនបង្កើតទាំងពីរដែលនិរទេសខ្លួនត្រូវបានគេប្រទះឃើញនៅផ្លូវ Cecil Street ហើយបានកុម៉្មង់អាហារតាមចិញ្ចើមផ្លូវ​ដ៏​ពេញ​និយម​របស់​ប្រទេស​ម៉ាឡេស៊ី​គឺ Koay Teow th’ng និង Pasembur ​របស់​ចិន នៅ​ម៉ោង​ប្រហែល ១ រសៀល អំឡុងពេលអាហារថ្ងៃត្រង់កាលពីថ្ងៃពុធ ក្រោយពេលគេឃើញនៅឯអាហារដ្ឋានមួយកន្លែតនៅផ្លូវ Weld Quay ។

កាសែតបានរាយការណ៍ថា ការមកទស្សនារបស់ត្រកូលស៊ីណាវ៉ាត់ត្រាទាំងពីរទៅកាន់ទីក្រុងព្រំដែនម៉ាឡេស៊ីជាប់ភាគខាងត្បូងនៃប្រទេសថៃ មានការភ្ញាក់ផ្អើលយ៉ាងខ្លាំងពីអ្នករស់នៅរដ្ឋ Penang ដោយសារតែប្រជាប្រិយភាពរបស់ពួកគេ ហើយក៏បានសុំថតរូប Selfie ផងដែរ ។

កាសែត The Star បានរាយការណ៍ទៀតថា ត្រកូលស៊ីណាវ៉ាត់ត្រាទាំងពីរនាក់ក៏ត្រូវបានប៉ូលិសម៉ាឡេស៊ីអមដំណើរដោយម៉ូតូ និងដោយអង្គរក្សផងដែរ អំឡុងពេលពួកគេទៅលេងរដ្ឋ Penang ។

គួរបញ្ជាក់ថា លោក ថាក់ស៊ីន វ័យ ៧៣ ឆ្នាំ ជានាយករដ្ឋមន្ត្រី ២ ដងពីឆ្នាំ ២០០១ ដល់ ២០០៦ មុនពេលគាត់ត្រូវបានទម្លាក់ដោយរដ្ឋប្រហារនៅថ្ងៃទី ១៩ ខែកញ្ញា ឆ្នាំនោះ ។

ចំណែកលោកស្រី យីងឡាក់ អាយុ ៥៥ ឆ្នាំដែលបានបន្តដឹកនាំរលកនៃប្រជាប្រិយភាពមិនចេះចប់របស់លោក ថាក់ស៊ីន ដើម្បីក្លាយជានាយករដ្ឋមន្ត្រីស្ត្រីដំបូងរបស់ប្រទេសក្នុងឆ្នាំ ២០១១ ក៏ត្រូវបានទម្លាក់នៅក្នុងរដ្ឋប្រហារដូចគ្នាដោយក្រុមលោក ប្រាយុទ្ធ ចាន់អូចា កាលពីថ្ងៃទី ២២ ខែឧសភា ឆ្នាំ ២០១៤ ៕

ប្រែសម្រួលដោយ ៖ ជីវ័ន្ត

ប្រភព ៖ The Nations

ចុចអាន ៖ កូនស្រីពៅលោក ថាក់ស៊ីន ចុះឃោសនារកសំឡេងឆ្នោតឲ្យបក្សភឿថៃ