រត់ជាន់គ្នាស្លាប់ជាង ១២៩ នាក់ក្នុងការប្រកួតបាល់ទាត់នៅ ឥណ្ឌូណេស៊ី

ប៉ូលិសឥណ្ឌូណេស៊ីបាននិយាយកាលពីថ្ងៃអាទិត្យថា មនុស្សយ៉ាងហោចណាស់ ១២៩ នាក់បានស្លាប់ និងប្រហែល ១៨០ នាក់បានរងរបួសនៅក្នុងការប្រកួតបាល់ទាត់មួយក្នុងប្រទេសឥណ្ឌូណេស៊ី បន្ទាប់ពីហ្វូងមនុស្សបានរត់ជាន់គ្នា ហើយវាជាគ្រោះមហន្តរាយនៅឯកីឡដ្ឋានដ៏អាក្រក់បំផុតមួយរបស់ពិភពលោក ។

មេប៉ូលិសខេត្ត East Java លោក Nico Afinta បានប្រាប់អ្នកសារព័ត៌មានថា បន្ទាប់ពីការប្រកួតបាល់ទាត់នៅខេត្ត East Java រវាងក្រុម Arema FC និងក្រុម Persebaya Surabaya បានបញ្ចប់កាលពីយប់ថ្ងៃសៅរ៍, អ្នកគាំទ្រក្រុមចាញ់បានសម្រុកចូលទីលាន ដោយធ្វើឲ្យប៉ូលិសបានបាញ់ឧស្ម័នបង្ហូរទឹកភ្នែក ហើយក៏បង្កឲ្យមានការរត់ជាន់គ្នា និងករណីនៃការថប់ដង្ហើម ។

នៅក្នុងសេចក្តីថ្លែងការណ៍មួយនៅថ្ងៃអាទិត្យនេះលោក Afinta បាននិយាយថា ក្នុងនោះក៏មានមន្ត្រីប៉ូលិស ២ នាក់ផងដែរ ក្នុងចំណោមអ្នកស្លាប់ទាំងនោះ ខណៈមនុស្ស ៣៤ នាក់បានស្លាប់នៅខាងក្នុងកីឡដ្ឋាន ហើយអ្នកផ្សេងទៀតបានស្លាប់នៅក្នុងមន្ទីរពេទ្យ ។

ទន្ទឹមនោះរដ្ឋមន្ត្រីកីឡារបស់ឥណ្ឌូណេស៊ីលោក Zainudin Amali បាននិយាយថា អាជ្ញាធរនឹងវាយតម្លៃសុវត្ថិភាពឡើងវិញក្នុងការប្រកួតបាល់ទាត់ ក៏ដូចជាពិចារណាមិនអនុញ្ញាតិឲ្យមានអ្នកទស្សនាចូលក្នុងកីឡដ្ឋានផងដែរ ។

គួរបញ្ជាក់ថា ការប្រកួតរវាងក្រុម Arema FC និងក្រុម Persebaya Surabaya ធ្វើឡើងនៅកីឡដ្ឋាន Kanjuruhan ក្នុងទីក្រុង Malang ហើយអ្នកគាំទ្ររាប់សិបនាក់បានប្រញាប់ប្រញាល់ចូលទៅកាន់ទីលាន បន្ទាប់ពីក្រុម Arema ចាញ់ក្រុមភ្ញៀវ Persebaya Surabaya ក្នុងលទ្ធផល ៣-២ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ The Straits Times

ចុចអាន ៖ លោក Zelensky ឲ្យប្រជាជននៅតំបន់មួយរបស់ រុស្ស៊ី ប្រយុទ្ធដើម្បីបញ្ចៀស​ការស្លាប់