អង់គ្លេស ថា ចាញ់បារាំងថ្ងៃមុន ដោយសារអាជ្ញាកណ្តាល

អាជ្ញាកណ្តាលសញ្ជាតិប្រេស៊ីលលោក Wilton Sampaio ត្រូវគេស្តីបន្ទោសចំពោះការកាត់សេចក្តីរបស់គាត់ ក្នុងការប្រកួតដែលក្រុមតោកំណាចអង់គ្លេស ចាញ់មាន់គកបារាំង ២-១ ធ្លាក់ចេញពីពានរង្វាន់ World Cup ត្រឹមវគ្គ៨ក្រុមចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាកណ្តាលវ័យ៤០ឆ្នាំរូបនេះ បានរងការរិះគន់យ៉ាងចាស់ដៃអំឡុងការប្រកួតនោះ ជាពិសេសក្នុងតង់ទីមួយ នៅពេលគាត់មិនផ្តល់បាល់ប៉េណាល់ទីដល់អង់គ្លេស ពេលដែលកីឡាករ Dayot Upamecano បង្កកំហុសទៅលើ Harry Kane។

ក៏មានការសម្រេចចិត្តដ៏ចម្រូងចម្រាសមួយទៀតផងដែរ ចំពោះការមិនផ្តល់បាល់ Free Kick ដល់អង់គ្លេស ពេល Upamecano បង្កកំហុសដល់ Bukayo Saka មុនពេល Aurelien Tchouameni ស៊ុតបញ្ចូលទី។

ទោះក្នុងការប្រកួតនេះ លោក Sampaio បានផ្តល់បាល់ប៉េណាល់ទីដល់ទៅ២ដងទៅឲ្យអង់គ្លេសក៏ដោយ ប៉ុន្តែនៅមានកំហុសមួយចំនួនទៀតដែលកីឡាករនិងអ្នកគាំទ្រអង់គ្លេស មិនពេញចិត្តចំពោះកាត់សេចក្តីរបស់គាត់។

អតីតកីឡាករជម្រើសជាតិអង់គ្លេស Gary Neville បាន​និយាយ​ក្រោយ​ការ​ប្រកួត​ថា​ “លោកអាជ្ញា​កណ្តាល ​ខ្ញុំ​គិត​ថា​គាត់​មាន​សុបិន​អាក្រក់។ មនុស្សនឹងនិយាយថាវាជាលេស ប៉ុន្តែគាត់ជាមនុស្សអាក្រក់”។

ស្របពេលជាមួយគ្នានោះ អ្នកគាំទ្រអង់គ្លេសមួយចំនួន ក៏បាននាំគ្នាបង្ហោះសារលើបណ្តាញសង្គមព្រោងព្រាតផងដែរ ដោយសម្តែងការខកចិត្ត ហើយចោទថា “អង់គ្លេស ធ្លាក់ដោយសារ អាជ្ញាកណ្តាល”។

លោក Sampaio បានរងការរិះគន់រួចទៅហើយ សម្រាប់ការផ្តល់បាល់ប៉េណាល់ទីដ៏ចម្រូងចម្រាស ដល់អារ៉ាប៊ីសាអូឌីត ក្នុងជំនួបជាមួយប៉ូឡូញ។

គួរបញ្ជាក់ថា លោក Sampaio បានធ្វើជាអាជ្ញាកណ្តាលកាត់សេចក្តីចំនួន៣៨១ប្រកួតក្នុងអាជីពរបស់គាត់ ដោយបានផ្តល់កាតលឿងចំនួន១៨៥៦សន្លឹក និងកាតក្រហម១០២សន្លឹក។ គាត់​ក៏​បាន​ផ្តល់​បាល់​ពិន័យ​១១​ម៉ែត្រ​ ១១៤ដងផង​ដែរ៕

អត្ថបទ៖ Vann Vann

ចុចអាន៖ ជំនួប ហូឡង់-អាហ្សង់ទីន យប់មិញ ជាការប្រកួតមានកាតលឿងច្រើនបំផុត ក្នុងប្រវត្តិសាស្រ្ត World Cup