ព័ត៌មានជាតិ

លោក ជា ចាន់តូផ្តល់អគារមណ្ឌលសុខភាពថ្មីស្រឡាង ១ខ្នងកម្ពស់២ជាន់ដល់ឃុំតាំងក្រសាំង

បានផុស

៥ years មុន

នៅ

ថ្ងៃព្រហស្បតិ៍ ៧ មករា ២០២១

ដោយ

លោក ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជានិងប្រធានក្រុមការងារថ្នាក់ជាតិ ចុះជួយស្រុកស្ទុកនិងលោកស្រីខៀវស៊ីណាបានផ្តល់អគារមណ្ឌលសុខភាពតាំងក្រសាំងថ្មី១ខ្នងកម្ពស់២ជាន់ដើម្បីជាចំណងដៃក្នុងឆ្នាំថ្មីឆ្នាំ២០២១និងដើម្បីអបអរសាទរខួបអនុស្សាវរីយ៍លើកទី៤២ នៃថ្ងៃជ័យជំនះ ៧ មករា។

អគារថ្មីនេះ ត្រូវបានប្រារព្ធពិធីបញ្ចុះបឋមសិលាបើកឲ្យដំណើរការកសាងជាផ្លូវការ នៅថ្ងៃទី៧ ខែមករា ឆ្នាំ២០២១ ក្រោមអធិបតីភាពលោក ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាល គណបក្សប្រជាជនកម្ពុជា និងប្រធានក្រុមការងារថ្នាក់ជាតិ ចុះជួយស្រុកសន្ទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគារថ្មីនេះ មានកម្ពស់២ជាន់ បណ្ដោយ៤៥ម៉ែត្រ ទទឹង១៦ម៉ែត្រ និង២៨បន្ទប់ សាងសង់ពីថ្ម ក្នុងតម្លៃជាង២៥ម៉ឺនដុល្លាអាមេរិក។

លោក ជា ចាន់តូ បានមានប្រសាសន៍ថា ការកសាងអគារថ្មីសម្រាប់មណ្ឌលសុខភាពតាំងក្រសាំង នៅពេលនេះ មានតម្លៃធំធេងក្នុងការលើកស្ទួយសុខភាពប្រជាពលរដ្ឋ។ តាមរយះអគារថ្មីនេះដែរ បានបង្ហាញឲ្យឃើញពីការយកចិត្តទុកដាក់ចំពោះតម្រូវការចាំបាច់ ក្នុងការថែរក្សាការពារ និងការលើកសុខាមាលភាព ជូនប្រជាពលរដ្ឋក្នុងតំបន់នេះ។

លោក ជា ចាន់តូ បានសំណូមពរដល់ក្រុមគ្រូពេទ្យ ឲ្យបង្កើនការយកចិត្តទុកដាក់ និងត្រូវមានការទទួលខុសត្រូវខ្ពស់ក្នុងការពិនិត្យ ព្យាបាលជំងឺជូនប្រជាពលរដ្ឋ។ ជាមួយនេះដែរ ក៏ត្រូវបន្តអប់រំប្រជាពលរដ្ឋអំពីវិធីការពារ ការឆ្លង រាលដាលជំងឺកូវីដ-១៩ជាប្រចាំ តាមការណែនាំរបស់ក្រសួងសុខាភិបាល។

លោក ជា ចាន់តូ បានបញ្ជាក់ថា សមិទ្ធផលនេះកសាងឡើងស្របពេលដែលប្រជាជនកម្ពុជា ទូទាំងប្រទេស ប្រារព្ធ អបអរសាទរខួបអនុស្សាវរីយ៍លើកទី៤២ នៃថ្ងៃជ័យជម្នះ៧មករា ថ្ងៃដែលប្រទេសកម្ពុជា ត្រូវបានសង្គ្រោះ និងរំដោះចេញផុតពីរបបកម្ពុជា ប្រជាធិបតេយ្យផងដែរ។

លោក ជា ចាន់តូ បានចាត់ទុកសមិទ្ធផលថ្មីដែលកកើតឡើងលើទឹកដីស្រុកសន្ទុកនាពេលនេះ គឺបានមកពីកម្លាំងសាមគ្គី ពិសេសសុខសន្តិភាពកើតចេញពីនយោបាយឈ្នះឈ្នះរបស់សម្ដេចតេជោ ហ៊ុន សែន ៕

អត្ថបទ ៖ សំអឿន

Related Topics:ការសាងសង់អគារថ្មី