កំណែទម្រង់យោធាថ្មីរបស់ រុស្ស៊ី ផ្ដោតលើការពង្រីករបស់ ណាតូ

លោក Valery Gerasimov ឧត្តមសេនីយថ្មីរបស់រុស្ស៊ីដែលទទួលបន្ទុកប្រតិបត្តិការសឹកនៅអ៊ុយក្រែនបាននិយាយថា កំណែទម្រង់យោធាថ្មីរបស់រុស្ស៊ីនឹងឆ្លើយតបទៅនឹងការពង្រីកណាមួយរបស់អង្គការណាតូ ក៏ដូចជាសកម្មភាពរបស់ប្រទេសនៃសមូហភាពលោកខាងលិច ដែលលោកចោទប្រកាន់ថា បានធ្វើសង្រ្គាមកូនកាត់ប្រឆាំងនឹងទីក្រុងមូស្គូ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការអត្ថាធិប្បាយជាសាធារណៈលើកដំបូង លោក Valery Gerasimov បានលើកឡើងថា “ប្រព័ន្ធនៃការបណ្តុះបណ្តាល ក៏ដូចជាការកែនទ័ពនៅក្នុងប្រទេសរបស់យើងត្រូវបានរៀបចំយ៉ាងពេញលេញទៅនឹងទំនាក់ទំនងសេដ្ឋកិច្ចទំនើបថ្មី” ។

លោក Gerasimov បានប្រាប់គេហទំព័រព័ត៌មាន Argumenty i Fakty ថា កំណែទម្រង់យោធាដែលបានប្រកាសនៅពាក់កណ្តាលខែមករា អាចត្រូវបានកែសម្រួល ដើម្បីឆ្លើយតបទៅនឹងការគំរាមកំហែងថ្មីលើផ្នែកសន្តិសុខពីសំណាក់អង្គការណាតូ ។

លោកបាននិយាយថា “សព្វថ្ងៃនេះ ការគំរាមកំហែងផ្នែកសន្តិសុខរបស់យើង រួមមានការប្ដេជ្ញារបស់សម្ព័ន្ធអាត្លង់ទិកខាងជើង ដើម្បីពង្រីកបន្ថែមនៃការចូលជាសមាជិករបស់ប្រទេសហ្វាំងឡង់ និងស៊ុយអែត ក៏ដូចជាការប្រើប្រាស់អ៊ុយក្រែនជាឧបករណ៍សម្រាប់ធ្វើសង្រ្គាមកូនកាត់ប្រឆាំងនឹងប្រទេសរបស់យើងជាដើម” ។

គួរបញ្ជាក់ថា ប្រមុខអគ្គសេនាធិការរុស្ស៊ីលោកឧត្តមសេនីយ៍ Valery Gerasimov ត្រូវបានតែងតាំងកាលពីពាក់កណ្ដាលខែមករាកន្លងទៅឲ្យដឹកនាំកងកម្លាំងចម្រុះរបស់ទីក្រុងមូស្គូនៅក្នុងប្រទេសអ៊ុយក្រែន ជំនួសតំណែងឧត្តមសេនីយ៍​ Sergey Surovikin ដែលត្រូវ​បាន​តែងតាំង​ជា​អនុប្រធានវិញ ៕

ប្រែស្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី កម្ទេចអាវុធ អាមេរិក ផ្ដល់ឲ្យ អ៊ុយក្រែន ដណ្ដើមបានភូមិចំនួន ២ ទៀត