លោក ហ្សេលេនស្គី នឹងលក់ជ័យជម្នះរបស់ អ៊ុយក្រែន ទៅឲ្យលោកខាងលិច

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី (Volodymyr Zelensky) បានអះអាងថា “លោកនឹងលក់ជ័យជម្នះរបស់អ៊ុយក្រែនទៅឲ្យលោកខាងលិច ប្រទេសចិន អ៊ីរ៉ង់ និងទៅកាន់ប្រទេសផ្សេងទៀតផងដែរ” ។

ការអះអាងរបស់លោក ហ្សេលេនស្គី បានកើតឡើង បន្ទាប់ពីលោកចេញការព្រមានចំពោះផែនការវាយដណ្ដើមយកមកវិញនូវគ្រប់តំបន់ ក៏ដូចជាទីក្រុងដែលកំពុងត្រូវបានឡោមព័ទ្ធដោយកងកម្លាំងរុស្ស៊ី ជាពិសេសក្នុងសមរភូមិប្រយុទ្ធនៅទីក្រុងជួរមុខ បាក់មុត (Bakhmut) ភាគខាងកើត ។

ទន្ទឹមនោះ ការព្រមានរបស់លោក ហ្សេលេនស្គី ក៏កើតមានឡើងក្នុងរយៈពេលតែ ១ សប្ដាហ៍ប៉ុណ្ណោះ ក្រោយពេលដែលលោកបានចុះផ្ទាល់ទៅដល់ទីក្រុងជីករ៉ែអំបិលមួយនេះ ដើម្បីបង្ហាញការគាំទ្រ និងលើកទឹកចិត្តដល់កម្លាំងជួរមុខដែលកំពុងឈរជើងប្រយុទ្ធ បន្ទាប់ពីមានការវាយសន្ធាប់ពីក្រុមទាហានស៊ីឈ្នួលរុស្ស៊ី Wagner Group ។

ប្រធានាធិបតីអ៊ុយក្រែនរូបនេះបានប្រាប់ទាហានថា ពួកគេមានបេសកកម្មជាប្រវត្តិសាស្ត្រក្នុងការការពារទឹកដីអ៊ុយក្រែន និងត្រូវខិតខំប្រឹងប្រែងវាយដណ្ដើម ក៏ដូចជាការពារទឹកដីទាំងអស់ដែលមានទង់ជាតិពណ៌ខៀវ និងពណ៌លឿង ។

គួរបញ្ជាក់ថា ជ័យជម្នះនៅទីក្រុង បាក់មុត ដែលមានប្រជាជនមុនសង្រ្គាមប្រហែល ៧ ម៉ឺននាក់ នឹងផ្តល់ឲ្យរុស្ស៊ីនូវរង្វាន់ធំទីមួយនៃការវាយលុករដូវរងា បន្ទាប់ពីបានកែនទាហានបម្រុងរាប់សែននាក់កាលពីឆ្នាំមុន ហើយវាក៏នឹងក្លាយជាជំហានមួយទៀតដើម្បីដណ្តើមយកតំបន់ដុនបាស់ (Donbas) ដែលជាគោលដៅសង្គ្រាមដ៏សំខាន់របស់រុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មិនឲ្យចាញ់ អ៊ុយក្រែន, រថក្រោះថ្មីសន្លាងរាប់រយគ្រឿងទៅដល់ដៃទ័ព រុស្ស៊ី សម្រាប់ប្រយុទ្ធនៅតំបន់សឹក